Mayor Soc posibleng apilon sa imbestigasyon

CEBU, Philippines - Ang mayor sa dakbayan sa Talisay nga si Socrates Fernandez posibleng malakip sa mapasakaan og kaso tungod sa pag-ikyas sa iyang anak nga si Joavan Fernandez.

Si Supt. Elmer Lim, officer-in-charge sa Talisay City Police Station nga nahinabi sa Banat News kagahapon mibutyag nga nagpahigayon na sila og imbestigasyon kabahin sa mga tawo nga giingong mitabang sa pag-ikyas ni Joavan gikan sa Talisay City detention cell.           

Matud ni Lim nga posibleng mapasakaan usab nila og kaso ang mayor kung makakita sila og mga lig-ong ebidensiya batok niini.

Giangkon ni Lim nga sa pagkakaron dili pa sila maka-focus sa maong problema tungod sa eleksiyon karong Lunes.

Sa laing bahin, nasagmuyo ang mga imbestigador dihang ang footage sa Close Circuit Television (CCTV) camera sa usa ka fast food chain sa A.S. Fortuna sa Mandaue City diin gi-park ang sakyanan sa Mayor’s Office ang giingong na-reformat ug wala na ma-retrieve pa ang mga record niini sa maong adlaw.

Ang maong sakyanan nga usa ka Mitsubishi Adventure maoy gigamit sa pag-ikyas ni Joavan nga giabandonar sa Mandaue ug nakit-an niadtong Huwebes.

Si Lim mibutyag nga sa sunod semana posibleng mogawas na ang warrant of arrest ni Joavan sa kaso nga illegal possession of explosive nga ilang gipasaka.

Kahinumduman nga human masikop si Joavan niadtong Lunes sa gabii diha sa gawas sa balay sa iyang amahan sa South Gate Subdivision sa barangay Bulacao na-recover sa mga polis gikan sa iyang posesyon ang usa ka pusil nga dunay upat ka buhing mga balay, usa ka bala sa kalibre .45 nga pistola ug usa ka granada.

Si Joavan napasakaan  og kasong illegal possession of firearm, kalapasan sa Comelec gun ban ug illegal possession of explosive.

Ang illegal possession of firearm ug kalapasan sa Comelec gun ban si Joavan pwedeng makabutang og piyansa sa maong mga kaso apan ang illegal possession of explosive usa kini ka non-bailable nga kaso.

Niadtong Biyernes ang mga tigbalita misuway og kuha og pamahayag gikan kang Fernandez apan ang mayor namalibad  tungod kay giingong wala una siya tugoti sa iyang mga abogado nga moluwat og pamahayag.  (BANAT NEWS)