Trabahante naghikog sud sa trabahoan

CEBU, Philippines - Patay nang napalgan sa iyang mga kauban ang 25-anyos nga stay in factory worker sa sud sa iyang trabahoan sa barangay Calajoan lungsod sa Minglanilla sa miaging alas 3:00 sa kaadlawon.

Ang gituohang nagpakamatay mao si Jessie Mancao, 25, taga Pitalo lungsod sa San Fernando ug factory worker sa Popular Feedmill Corporation nga nahimutang sa maong lugar.

Subay sa inisyal nga imbistigasyon ni SPO1 Isaias Cabuenas sa Minglanilla Police dihang nahinabi sa Banat News napalgan si Mancao sa kaubang si Canonigo Teodoro nga nagbitay nga may nylon nga pisi sa liog sulod sa bodega.

Sumala pa sa nakuhang impormasyon sa kapolisan base sa gibutyag sa mga trabahante naglisod og katulog ang biktima ini og kagabii tungod kay duna kini gikahadlokang giingong mopatay kaniya.

Gisuwayan pa unta og dala ngadto sa Minglanilla District Hospital apan gideklarar siyang patay na. (/EIM) (BANAT NEWS)