Hepe ug 6 ka polis ipalabay gawas sa Rehiyon

CEBU, Philippines - Duha ka mga hepe sa kapolisan sa lungsod sa Dumanjug ug Sogod ingon man unom ka mga polis ang girelibohan, ang uban kanila ilabay sa gawas sa Sugbu tungod sa giingong ilang kalambigitan sa illegal nga mga kalihokan.

Ang hepe sa kapolisan sa Central Visayas Chief Supt. Marcelo Garbo Jr., mibutyag sa Banat News nga iyang gi-aprobahan ang relief order nilang Insp.  Robert Lacernas ang hepe sa Dumanjug Police; SPO1 Felipe Vibar, chief investigator, SPO1 John Eric Cordovis; SPO1 Joel Sarmiento; PO2 Rafael Baritua; PO1 Danny Camero ug PO1 Arquiles Redoble.

Matud pa ni Garbo nga iyang girekomendar nga madestino ang pito  sa gawas sa Region 7, giklaro hinuon niyang wala kini kalambigitan sa politika kay sila napamatud-ang nakabuhat og kahiwian sa ilang pagka-polis.

Ang Provincial Intelligence Branch Deputy chief nga si Rogelio Amoroso maoy mohulip kang Lucernas. Samtang si Lucernas sa iyang bahin mipadayag sa Banat News sukad sa iyang panerbisyo wala siya malambigit og binuang.

Samtang nagparelibo sa iyang kaugalingon ang hepe sa kapulisan sa lungsod sa Sogod nga si Sr. Insp. Jose Rovic Villarin kinsa gibalhin sa Provincial Public Safety Company (PPSC) sa CPPO headquarters ug hulipan siya ni Chief Insp. Randy Naval.

Matud ni Villarin dili mahitungod sa politika ang rason sa iyang pagbalhin kun dili iya gyud kining kabubut-on. (BANAT NEWS)