Sebusa nanghimakak nga miendorso siya'g kandidato

CEBU, Philippines - Gipanghimakak sa hepe  sa Cebu City Bantay Dagat Commission (CCBDC) ang pasangil  nga  nanginlabot  siya  sa kalihokan  sa  mga  mananagat  nga  mipirma  og  covenant  pagsuporta  sa kandidatora  ni   manlalaban  Aristotle B. Batuhan  pagka-kongresista  sa  habagatang  distrito  sa dakbayan  sa Sugbo  sa piniliay  sa Lunes.

Sa suwat  nga  nadawat  sa Banat News  nga  gipetsahan  og Mayo 7, 2013 gipasabot  ni  CCBDC Executive Director  Ranulfo T. Sebusa  nga   wa  siya moendorso    og  kandidato  sa maong  higayon.

Matud  pa  niya  nga  wala  siyay  gipamulong pabor  sa  kandidato  ug  wala  usab  siya  manapit  og  kandidato  niadtong  Mayo 3, 2013  didto  sa iyang  buhatan.

Gitug-an  ni Sebusa  nga  igo  lang  siyang  misugot  sa hangyo  sa  mga  mananagat  nga  magtigom  sila  didto  ug  gawas  sa maong  kaakohan ,  gipahayag  sa hepe  sa CCBDC  nga wala  na  siya’y  laing  papel  nga  may  labot  sa pamolitika.

Alang  kang Sebusa,  ang  iyang  gibuhat  usa  lang  ka  pagtuman  sa iyang  katungdanan  isip  hepe  sa usa  ka  opisina  sa goberno  nga  bukas alang  sa publiko.

Busa  tungod  kay  mihangyo  man  ang  mga  mananagat  kaniya  nga  maghimo  sila  og  panagtagbo  sa  iyang  opisina, iya  silang  gitugotan.

Ang  maong  pamahayag  gihimo  ni  Sebusa  tungod  sa impormasyon  gikan  sa  mga  mananagat nga  gipadangat  sa Banat News  ug  napatik  sa  gula  niini niadtong Mayo 5, 2013 nga  nagkutlo   sa iyang (Sebusa)  ngalan  nga  mihisgot  og  suporta  kang  Batuhan.

Apan  sa  iyang  suwat  sa  Banat News kusganon  kining  gipanghimakak  ni Sebusa  aron  sa pagpamatuod  nga  wa  siya  mag-apil-apil  sa pamolitika ug  igo  lamang  siyang  misugot  sa hangyo  sa  mga  mananagat  sa paghimo  nila  og  kalihokan  didto  sa iyang  buhatan. (BANAT NEWS)