Tag-iya sa submarino andam mobayad sa nadaot nga mga gasang

CEBU, Philippines - Gibuak  sa tagdumala sa Cebu Yellow Submarine (CYS) ang  pagpakahilom niini  pinaagi  sa pagtubag  sa  mga  pasangil  nga gidaro  kuno  sa ilang submarino  ang  mga  gasang  ilawom sa kadagatan  sa siyudad  sa Lapulapu hinungdan pagkagusbat  niini.

 Sila  si  Lee Dong Gun, Presidente  sa CYS  ug Kim Jun, ang  general  manager nagkanayon  nga  dugay-dugay  na  silang  nakadungog  sa mga balita  bahin  sa maong  hitabo  apan  nagpakahilom  sila.

Sa pagkakaron  ilang  gipasalig  nga  mopahigayon  una  sila  og  imbistigasyon  diin  kun  mamatud-an  usab  nila  nga  tinuod  ang  nahitabo  dili  sila  mosupak  ug  andam  nilang  panubagon ang kalapasan  nga  nahimo  sa ilang  mga  piniyalan.

 Matud  pa  ni  Gun  ug  Jun nga   gituman  nila  ang  mando   sa kagamhanan  sa dakbayan  sa Lapulapu nga  misuspenso  sa  operasyon  sa ilang  sakyanan  ilawom  sa dagat   nga  misilbi sa  mga  turista ug nagpaabot  sila  kun  kanus-a  libkasa  ang  maong  suspension ug   andam  silang  mobayad  sa  danyos  sa  mga  kabatoan  ug  mga  gasang  nga gigusbat  sa  ilang  submarino. (/WC)  (BANAT NEWS)