Bata gi-hostage

CEBU, Philippines - Nalandig sa tambalanan ang usa ka hostage taker nga mi-hostage sa usa ka 11-anyos nga batang babaye kagahapon sa udto human kini napusilan sa mga polis diha sa barangay Bateria lungsod sa Daanbantayan. Ang napusilan mao si Cesar Dignos, kinsa kalit nga mibunlot sa 11-anyos nga batang nagduwa og volleyball atubangan sa balay sa bata ug gidala kini sa iyang payag.

Matud pa nga gihalog sa suspek ang biktima ug gipalingkod sa iyang paa ug gitionan sa dala niining sundang. Sumala pa ni PO3 Alfredo Mandal, imbestigador sa Daanbantayan Police  Station tungod sa kadugay sa negosasyon ug wala magpakita og senyales nga buhian sa suspek ang bata nakadesider sila nga gamitan kini og pwersa.

Usa sa mga polis ang mipunting sa ulo sa suspek ug maayong pagkaigo sa suwang niini hinungdan nga nabuhian ang bata ug sundang niyang gikuptan.  Ang duha gidala sa Daanbantayan District Hospital apan gibalhin kini sa Vicente Sotto Memorial Medical Center ang suspek. Ang bata nakaangkon og gamay’ng hiwa sa abaga, dughan ug kamot.( /EIM) (BANAT NEWS)