Illegal recruiter na-entrap

CEBU, Philippines - Nasikop sa usa ka entrapment operation ang usa ka babaye nga gipasanginlang illegal recruiter sa Brgy. Omapad sa dakbayan sa Mandaue sa milabay’ng gabii. Ang gidakop mao si Jovy Patindol Summerfield, 38, residente sa maong dapit human ireklamo sa usa ka 38-anyos nga babaye nga mipasangil nga nailad siya sa pag-recruit kaniya sa suspek.

Sumala pa ni MCPO Station 5 Chief, Sr. Insp. Alexander Nuñez personal nga midangop kanila ang ginang ug misumbong nga gipabayad kini ni Summerfield og kwarta alang sa paglihok sa papeles niini padung sa gawas sa nasud aron motrabaho.

Matud pa nga niadtong Abril 11 siya gi-recruit ni Summerfield ug gipangayoan na siya niini og P15 mil alang daw sa processing sa papeles apan gipangayoan na usab siya niini kay kuwang daw ang bayad. Tungod sa pagduda midangop siya sa kapolisan hinungdan sa gihimong entrapment operation niadtong Sabado nga miresulta sa pagkasikop ni Summerfield Nasuta sa kapolisan nga duna pay laing duha ka babaye ang nailad sa suspek nga taga Umapad. (/EIM) (BANAT NEWS)