Dispatser giluba angol sa driver

CEBU, Philippines - Giluba  angol  sa usa   ka wala  hiilhing drayber  sa PUJ  ang  usa  ka dispatser  kinsa  nagbagulbol  tungod  kay  wala  kini hatagi  og  tong,   didto  sa N. Bacalso Ave.,  barangay  Labangon,  ning  dakbayan sa Sugbo  sa miaging  gabii. Ang  biktima  giila  nga si Baltazar Abanid, 29, taga sitio Bonbonan, Labangon,  ug dispatser  sa PUJ.

Ang  biktima kansang  kilid  nabuslot  agi  sa kutsilyo  mitug-an  sa  mga  imbistigador  sa kapolisan  nga nanawag  siya  og  pasahero  sa  mga  PUJ  nga  mobiyahe  ngadto  sa Bulacao, dakbayan  sa Sugbo.

Dihang  napuno na, nangayo  siya  og  tong  gikan  sa drayber  sa maong  PUJ  apan  mibalibad  kini sa paghatag.

Giangkon  sa biktima  nga  sa iyang  kalagot nagbagulbol  siya  ug tungod kay  wala  siya  kapugong  sa iyang  kaugalingon  iyang  gihapak  sa iyang  kamot  ang  kilid  sa PUJ  busa  milagapak  kini.

Sa kalagot  sa drayber, nanaog  kini  sa sakyanan  dayon  milanit sa iyang  kutsilyo ug  gihansak  sa iyang kilid.

Ang  biktima  usab  nga  wala’y  praktis  sa self-defense  wala  molihay  busa  gisampakan   sa kutsilyo  ang  iyang  kilid.

Gihatud  dayon  kini  sa iyang  mga  kaubang  dispatser  ngadto  sa Cebu City  Medical Center  samtang  padayon  pang  gipangita  sa kapolisan ang  kriminal  nga  drayber. (BANAT NEWS)