Peace covenant sa Bogo City giplantsa pa
CEBU, Philippines - Ang Commission on Elections sa Bogo City nagpaabot sa final draft sa gi-proposed nga "peace covenant" alang sa mga lokal nga kandidato nga gideklarar nga usa ka "high risk" nga lugar karong umaabot na piniliay.
Si Bogo City election officer Michael Angelo Sarno nga nahinabi sa Banat News nagkanayon nga ang mga abogado sa kampo sa mga Salimbangon ug Martinez nag-meeting sa miaging semana aron sa paggama sa peace covenant.
"As of now, I am waiting for the final draft which will be agreed by both parties before we can come up with a peace covenant and signed by the candidates," matud pa ni Sarno.
Ang mga Salimbangons ug Martinezes kontra partido kini sila sud sa dugay nang katuigan.
"Ako uyon kaayo ko anang peace covenant. Wala may kandidato nga gusto og gubot. Maayo unta nga madayon na. Ang among kampo gusto gyud og peace," matud pa ni Daphne Salimbangon, kinsa nidagan isip mayor kontra ni Mayor Celestino "Junie" Martinez.
Si Salimbangon, kinsa anak ni incumbent Fourth District Representative Benhur Salimbangon nagkanayon nga dili na niya buot mahitabo pa ang kagubot sa 2010 Elections.
Midungag si Salimbangon nga ang iyang abogado ni-email na sa ilang proposal ngadto sa abogado sa mga Martinez nga si Atty. Ace Escolar.
Gisuwayan sa Banat News nga makontak si kanhi Bogo mayor ug kongresista Celestino "Tining" Martinez alang sa ilang habig apan pakyas ang maong tinguha.
Si Sarno ug ang mga abogado sa duha ka kampo mag-abot karong Mayo 8 aron matino kung ipadayon ba ang peace covenant o dili na lang. (BANAT NEWS)
- Latest
