CHED way giaprobahang usbaw sa tuition
CEBU, Philippines - Gitataw sa Commission on Higher Education (CHED)7 nga wala pay naaprobahan sa ilang central office nga aplikasyon bahin sa usbaw nga bayranan sa eskuylahan niining taliabot nga pagbukas sa klase. Si Manlalaban Pacita Isogan sa CHED7 sa tulumanon Alagad sa Serbisyo Sibil sa DYMR Radyo ng Bayan Cebu nga gitambongan usab sa Banat News nagkanayon nga ang tanang aplikasyon alang sa usbaw nga bayranan sa tuition dinhi sa Central Visayas ilang gihandos ngadto sa Manila.
Sa pagkakaron matud pa niya wala pa silay nadawat nga pahibawo gikan sa ilang ulohan nga buhatan bahin sa maong aplikasyon. Matud niya nga wala na usab nila masuta ang gidaghanon sa mga eskuylahan nga mi-apply og tuition fee increase.
Hinuon midugang si Isogan nga ilang gipalapdan karon ang scholarship program aron katabangan ang mga kabus apan utokan nga mga estudyante.
Kini pinaagi sa pagpanghangyo nila sa mga senador kansang pork barrel maoy ilang itahan alang sa gahin nga ilang itabang sa edukasyon. Si Mary Ann Merabueno kinsa maoy in-charge sa scholarship program sa CHED7 nagkanayon nga sa pagkakaron adunay 720 ka luna alang sa mga kwalipikadong estudyante nga motungha sa kolehiyo inigbukas sa klase karong Hunyo dinhi sa Central Visayas.
Matud niya nga sa wala pa ang gradwasyon sa high school niadtong Marso matag eskuylahan gipadad-an na nila og mga scholarship form.
Sa maong porma gihan-ay na ang kwalipikasyon sa madawat sa maong scholarship nga naglakip sa porsento sa ilang grado ingon man ang background sa aplikanteng estudyante, panginabuhi ug kinitaan sa mga ginikanan ug uban pa.
Miingon si Merabueno nga ang kalipikado ug makapasar nga aplikante magdawat kini og P15,000 matag semester nga financial aid gikan sa kagamhanan.
Hinuon ang labing bantayan sa estudyante mao ang pagmintinar sa ilang grado aron nga di mawagtang kanila ang tabang financial hangtud nga mograduwar sila sa ilang kurso. (BANAT NEWS)
- Latest
