6 anyos nadasmagan sa Ceres patay

CEBU, Philippines - Patay diha-diha ang usa ka 6-anyos nga batang lalaki human kini dasmagi  sa Ceres bus  didto  sa Sitio Combado, barangay Bagay sa lungsod sa Daanbantayan  sa miaging  adlaw.

Ang biktima mao si Nathaniel Mongaya Gastador, 6, molupyo sa nahisgutang lugar.

Samtang ang nakadasmag   niini  mao ang Ceres bus nga gimaneho ni Michael Golfan, 33, taga barangay Pajo ,sa lungsod sa Daanbantayan.

Si PO3 Rey Aballe sa Daanbantayan Police Station  mibutyag   sa Banat News  nga gikan sa siyudad sa Sugbo ang bus paingon sa Maya,  Daanbantayan.

Samtang  ang  biktima giingong gikuptan sa maguwang   niini  nga  si Annabelle, 18,  apan samtang  naglakaw  sila daplin  sa karsada  mikalit  og lugnot  ang  biktima  busa nabuhian  kini  sa maguwang  ug midagan  ngadto  sa tunga sa karsada.

Naatol  usab  nga  maoy  pag-agi  sa   Ceres  bus  ug  gumikan  sa kakalit  wala  na  makontrolar  sa driver  ang  preno  sa sakyanan  busa  nadasmagan   gayud  ang  bata.

Nalagpot  ang  biktima  og pipila ka metros ang gilay-on   ug gumikan  sa grabeng  kadaot  sa lawas  niini  diha-diha  nabugtoan  sa  iyang  kinabuhi.

Boluntaryo   nga  mitahan sa kapolisan  ang  driver  kinsa  nabalhug  usab  dayon  sa prisohan  sa maong  lungsod  ug  andam  moatubang sa kiha  nga  isang-at  batok  kaniya.  (BANAT NEWS)