Amahan nga Davide mihimakak nga anino lang niya si Junjun

CEBU, Philippines - Giklaro ni kanhi  Supreme Court Chief Justice Hilario Davide Jr. nga walay kamatuoran ang pasangil sa mga kaatbang sa politika sa iyang anak kabahin sa isyu nga anino niya ang iyang anak nga si Hilario Junjun Davide III kinsa nagpapili isip  gobernador sa lalawigan sa Sugbo.

Namahayag niini si Davide sa breakfast forum nga gipahigayon sa Knights of Columbus kung diin nahimo siyang bisita. Iyang gipatin-aw nga adunay kaugalingong baruganan ug panglantaw ang iyang anak nga si Junjun ug giidolo lang siya sa iyang anak tungod sa iyang nahimo pagserbisyo ug pagpangalagad sa publiko.

Ang breakfast forum sa Knights of Columbus nagdala sa tema nga “Good Governance” diin apil sa mga isyu nga natuki mao ang kontrobersyal nga Reproductive Health Law, Freedom of Information Bill ug ang nagsingabot nga piniliay sa Mayo 13. Matud pa ni Davide dili igong basehan ang gihimong desisyon kabahin sa RH Law sa mga politiko aron sila botaran o dili , samtang gianugonan ang kanhi Chief Justice nga wala mapasar sa Kongreso ang Freedom of Information Bill nga magsilbi untang giya alang sa “accountability” sa mga opisyal sa kagamhanan ilabi na kung may kalambigitan sa interes sa katawhan. (BANAT NEWS)