Napatay nga tulisan wanted sa Ozamis

CEBU, Philippines - Nalambigit usab sa pipila ka pagpanulis ug pagpatay ang nakigpinusilay sa kapolisan sa dakbayan sa Mandaue nga si Renante Baldicantos kinsa napusilan patay sa miaging gabii diha sa Acacia Hills barangay Jagobiao.

Ang hepe sa kapolisan sa Investigation and Detective Management Branch sa Mandaue City Police, Chief Insp. Michael Bastes mibutyag nga si Baldicantos nakapatay og barangay kapitan didto sa Ozamis City.

Gawas niini, nalambigit usab sa pagpangarnap diha sa Tangub City ug aduna usab kini standing warrant.

Matud pa ni Bastes nga gawas sa Ozamis City, aduna usab mga kaso sa pagpanulis si Baldicantos sa Luzon ug sa Sugbo ilabi na sa dakbayan sa Mandaue.

Gikompirmar sa deputy chief sa IDMB nga si Sr. Insp. Ramil Morpos nga si Baldicantos maoy responsable sa pagpanulis diha sa Canduman ug sa area sa Station 4 sa maong dakbayan.

Samtang ang amahan sa napatay ni Baldicantos nga si Noely ang personal nga mibisita sa buhatan sa IDMB aron usab sutaon ug tan-awon ang hitsura sa tawong nagpatay sa iyang anak nga si Lyriza Amar niadtong Abril 12 ning tuiga.

Matud pa nga susama sa naibtan siya’g tunok tungod sa hustisyang nakab-ot sa kamatayon sa anak. Nakuhaan og footage sa closed circuit television camera ang usa ka lalaki nga sama og pamarog ni Baldicantos dihang gitulis ug gipatay si Amar.

Gisuta usab ni Bastes kun ang grupo sa Parojinog Robbery Group ug si Baldicantos dili ba usa lang tungod usab sa ilang gigikanan. (Lesley Caminade-Vestil/EIM) (BANAT NEWS)