29 ka mayor mosuporta ni Soco

CEBU, Philippines - Mikabat  sa  29 ka  mga mayor  sa lalawigan  sa Sugbo  ang  mikonpirmar  nga  mosuporta  sa kandidatora ni vice  gubernatorial  candidate Glenn Soco.

Mao  kini  gibutyag  sa  maong  negosyante sa pakighinabi  sa Banat News  kagahapon.

Matud pa  ni  Soco  nga sa  iyang  paglibot  sa lalawigan  pinaagi  sa pagpanuaw  sa  mga  kalungsoran  ug  kabarangayan  sa habagatan  ug  sa amihanan nakuha  niya ang  pulso  sa  mga  mayor  kinsa  mipasalig  nga  andam  sila  nga  mobulig  kaniya  sa  umaabot  nga  piniliay  sa Mayo 13.

Nagdumili si Soco  pagbutyag  sa  mga  ngalan  sa maong  mga  mayor  apan  dako siya  og  pagsalig  nga matinud-anon  sa ilang  pasalig  ang  maong  mga  mayor.

“Bisan  mga  politiko  sila  apan  sa ilang gisaad  kanako mituo  ako  nga may word  of  honor sila  isip  halangdong  mga  tawo  sa ilang  lungsod”, matud  pa  ni Soco.

Si  Soco  nga  kandidato  sa Independent  Party  gi-atbangan  ni acting  governor  Agnes  Magpale  sa Liberal  Party  ug Boboy  Durano  sa One Cebu Party.

Si  Soco  kinsa napildi sa maong  posisyon  kang anhing  bise  gobernador  Greg Sanchez  sa election niadtong 2010, nagkanayon  nga  nasuta niya  nga  dako  kaayo  siya  og purohan  sa kadaugan  niining  iyang  ikaduhang  pagpapili  sa  pagka-bise  gobernador  sa lalawigan  karong  Mayo 13  nga  piniliay. (Darrel A. Carumba/WC) (BANAT NEWS)