Pagsukarap sa rating wa igsapayan ni Chiz

CEBU, Philippines - Wala panumbalinga ni Senador Francis “Chiz” Escudero ang pag-ubos sa iyang ranking sa labing ulahing survey sa mga kandidato sa pagka-senador sa eleksiyon karong Mayo 13.

Matud pa ni Escudero kinsa dinhi sa Sugbo kagahapon nga wala nila gipanghambog ang pag-una niya sa nangaging survey hinoon iya kini gihimong giya sa ilang pagabuhaton.

Iyang giklaro nga sa katapusan, ang resulta sa eleksiyon kung pila ka boto ang ilang makuha mao ang katoohan ug dili ang survey.

Matud pa niya nga dili usab siya sama sa ubang politiko nga kung ubos sa survey ilang sawayon ang grupo nga nagpahigayon niini apan kung taas, himoon dayun nga tinuod.

Daku ang pagsalig ni Escudero sa mga botante nga dili dayon motoo sa mga intriga nga ilabay batok kaniya.

Usa sa lig-ong hinagiban ni Escudero mao ang iyang nahimo sa Senado batok sa mga pagpangdaut, black propaganda ug uban pang isyu nga mogawas lang panahon sa eleksiyon.

Alang kang Escudero, ang mahinungdanon mao nga masulod siya sa dose nga pilion sa pagka-senador ug dili importante ang numero uno sanglit pareho ra ang sweldo ingon man ang termino nga unom ka tuig.

Si Escudero gikuyogan ni Kris Aquino kinsa kusganong mi-endosar sa kandidatura niya dinhi sa Sugbo.

Kauban niya ang laing kandidato sa pagka-senador ubos sa Liberal Party nga si Grace Poe.

Nagpasalamat si Escudero sa pag-endorso ni Kris kinsa naila na kaayo sa pag-endurso sa mga iladong produkto. (Gregg M. Rubio/WC) (BANAT NEWS)