Tubigon nakadawat og award

CEBU, Philippines - Ang lungsod sa Tubigon, Bohol nakadawat  og Presidential Award for the Most Child-Friendly Cities and Municipalities  sa  gipahigayong  National Search for Child Friendly Municipality sa tibuok  nasud. Ang  maong  pasidungog nadawat  sa  mga  opisyal  sa lokal  nga  kagamhanan  sa Tubigon sa  awarding  ceremony  nga  gihimo  didto  sa University of the Philippines (UP) sa Diliman.

Matud pa ni Jaybee Binghay tigpamaba sa Department of Social Welfare and Development (DSWD) 7 nga ang Tubigon maoy nanghawod sa lima ka finalist alang sa 1st hangtod sa 3rd class municipal category ug usab sa  36   pang misalmot nga mga Local Government Units (LGUs) sa tibuok nasud.

Dugang pa ni Binghay nga ang ubang  mga mananaog naglakip sa Villaverde, Nueva Vizcaya sa rehiyon 11, alang sa 4th-6th class municipal category; syudad sa Tagaytay sa Cavite nga maoy nakakuha sa Component City Category; ang syudad sa Davao sa rehiyon XI alang sa Highly Urbanized Category ug syudad sa Santiago sa rehiyon 11 alang sa Independent Component City Category.

Sumala pa ni Binghay nga kining maong Presidential Award for Child Friendly Municipalities and Cities gipasiugdahan  sa Council for the Welfare and Development (CWC) nga usa ka kaubang ahensya sa DSWD nga giisip nga usa ka self assessment mechanism sa  mga  siyudad ug  lungsod  nga mainampingon  sa  mga  kabataan.

Usa  niini  mao  ang  pagbutang sa  ilang lugar og mahigalaong  lugar alang  sa kabataan  sama  sa tulunghaan, hinlo  nga kalikopan, desiplinadong  katawhan, way  mga  illegal  nga  drugas, illegal  nga  sugal, inom, ug  tanang  bisyo  nga  mohatag  og  maot  nga  pagtulun-an  sa kabataan. (Liezl  Mabini Frasno-Correspondent/WC) (BANAT NEWS)