Life 2013 mi-endorsar og mga kandidato

CEBU, Philippines - Ang Lay Initiatives for Election (LIFE) 2013 miendorsar og walo ka kongresista sa Sugbo, tulo ka party-list, tulo ka mayor, usa ka vice mayor ug 12 ka mga kandidato pagkasenador.

"We need to ensure the needed numbers of pro-life senators and congressmen in the 16th congress. After RH bill, we cannot allow another failure. We will do our best to help ensure a pro-life victory this May 13," matud pa ni Dr. Rene Josef Bullecer ang country director sa Human Life International.

Sa pagka-kongresista, giendorsar nila si Gerard Anthony "Samsam" Gullas (First district); Pablo Garcia (second district); Gwendolyn Garcia (third district); Benhur Salimbangon (fourth district); Ace Durano (fifth district); Luigi Quisumbing (sixth district); Aileen Radaza (Lapulapu lone district) ug Raul Del Mar (Cebu City north district).

Alang sa pagkasenador, unom gikan sa United Nationalist Alliance, tulo sa Team PNoy, duha sa Kapatiran Party ug usa ka independente ang gi-endorsar sa LIFE 2013.

Sa Team PNoy mao sila Senador Antonio Trillianes, kanhi Senador Miguel Zubiri ug kanhi Las Piñas Representative Cynthia Villar.

Sila si Nancy Binay, kanhi senador Richard Gordon; Senator Gringo Honasan; Zambales Representative Mitos Magsaysay; Senador Aquilino Pimentel ug San Juan City Mayor Joseph Victor "JV" Ejercito Estrada.

Sa Kapatiran Party-list gi-endorsar nila si Marwill Llasos ug JC de los Reyes ug ingon man ang nidagan pagka independent nga si Christian Señeres.

Si Villar ug Estrada giendorso na usab sa White Vote Movement nga gipanguluhan sa El Shaddai ug ingon man ang Catholic Conscience Vote Phils.

Matud pa ni Bullecer, ang LIFE adunay 28 ka member organizations ubos sa Council of the Laity ug 29 ka nagkadaiyang charismatic groups sa Sugbo.

Alang sa partylists, giendorso nila si Manila Mayor Lito Atienza ubos sa  BUHAY partylist,  Atty. James Imbong,  Ang Prolife ug Rep. Pastor Alcover sa ANAD.

Giendorso usab nila si Kongresista Pablo John Garcia, nga midagan pagka gobernador ug Kongresista Eduardo Gullas sa pagkamayor sa Talisay City.

Ang mga mayor nga buot magpapili pag-usab nga sila  Michael Rama (Cebu City), Paz Radaza (LapuLapu City) ug Jonas Cortes (Mandaue City) ug Cebu City konsehal Edgardo Labella, nga nagpapili isip bise mayor, giendorso usab.

Ang LIFE 2013 mopahigayon karong Domingo og usa ka Unity for LIFE Prayer rally alas 4pm sa Plaza Independencia. (MItchelle Palaubsanon/EIM) (BANAT NEWS)