Ozamis Rob Gang nia pa

CEBU, Philippines - Dako ang pagtuo sa kadagkuan sa kapolisan sa dakbayan sa Sugbo nga ania pa gihapon ang Ozamis Robbery Group nga napakyas sa gituohang planong pagpanulis sa miaging adlaw sa usa ka jewelry store diha sulod sa usa ka mall sa North Reclamation Area.

Ang hepe sa kapolisan sa dakbayan sa Sugbo, Sr. Supt. Mariano Natuel Jr. mipadayag nga ang Parojinog Robbery Group nga gipanguluhan ni Aylon Parojinog nga manulis gyud unta niadtong Huwebes.

Gialarma na sa kapolisan ang tanang hotel, motel ug pension houses nga posibleng gisak-an sa grupo lakip na usab ang tanang financial institutions ug negosyo dinhi sa siyudad.

Wala usab isalikway ni Natuel ang posibilidad nga politiko ang nagpaluyo sa planong pagpanulis aron makatigom og pundo alang sa umaabot nga piniliay.

Sayo niini, usa ka van for hire ang ilang giilog gikan sa drayber ug gidala diha sa usa ka dakong mall sa North Reclamation Area apan tungod sa presensya sa usa ka patrolcar naratol ang grupo ug miikyas ug gibiyaan ang ilang mga armas ug gamit sa pagpanulis sa maong van. (Lesley Caminade-Vestil/EIM) (BANAT NEWS)