Ozamis Rob Gang napakgang

CEBU, Philippines - Planong pagpanulis sa Ozamis Robbery Group dinhi sa Sugbu napakgang, mga high-powered firearms, granada ug mga gamit sud sa usa ka giilog nilang van nasakmit diha sa parking lot sa usa ka dakong mall sa North Reclamation Area.

Nakuha sa kapolisan ang pito ka kalibre .45, duha ka KG9 submachine pistols, usa ka hand grenade, martilyo ug duha ka wrench gikan sa van.

Pasado ala-una sa hapon kagahapon, nakadawat og report ang kapolisan kalabot sa usa ka drayber nga giila lang sa pangalang Amay nagpakitabang human siya gigapos ug gituok sa mga tawong mi-hire sa iyang van.

Ang drayber misaysay nga usa ka lalaking nagpailang Aylon Parojinog  ang mihangyo sa ilang buhatan aron abangan ang ilang tinted nga klase sa van tungod kay iyang tagboon ang iyang asawa sa Pier Uno.

Matod pa ni Amay nga dihang nag-abot sila ni Parojinog sa North Reclamation Area usa ka yagpison nga lalaki ang misakay ug paglabay sa pipila ka minutos, laing duha ka lalaki na usab ang misakay.

Diha-diha kalit lang siya nga gituok ug gigapos sa maong mga lalaki ug giingnan siya nga dili pasabaon.

Matud niya nadunggan niya ang mga sakay may kaestorya sa telepono nga naghisgot sa oras sa ilang “pag-igo.” Apan gikatahong nadunggan niya ang mga lalaki nga nag-estoryahanay nga may  patrolcar sa polis nga nagsunod sa ilang van hinungdan nga mihinay-hinay sila og panganaog samtang nagdagan ang sakyanan.

Dihang mihunong ang van nagpakiluoy kini sa mga lalaki apan nahibulong na lang siya nga wala nay mitubag kaniya maong migawas siya sa van apan diha pay usa ka lalaking misita kaniya apan midagan usab ang maong lalaki palayo.            Ang hepe sa kapolisan sa dakbayan sa Sugbo Sr. Supt. Mariano Natuel Jr. mibutyag niadto pang milabay’ng semana sila mipahibalo sa mga bangko ug financial institutions bahin sa nangabot nga robbery group dinhi sa Metro Cebu.

Matud pang Natuel si Aylon maoy lider karon sa Parojinog Rob Gang. (Lesley Caminade-Vestil/EIM) (BANAT NEWS)