Team Rama paspasan ang kampanya

CEBU, Philippines - Giawhag ni Mayor Michael Rama  ang mga kandidato ubos sa Team Rama nga paspasan pa ang ilang pagpangampanya sa kabarangayan samtang nagkaduol na ang adlaw sa eleksyon.

Ang pamahayag ni Rama iyang giluwatan agi og reaksyon sa pag-endosar sa Associated Labor Unions-Trade Union Congress of the Philippines (TUCP) sa kandidatura ni Kongresista Tomas Osmeña pagkamayor sa dakbayan.

Gawas ni Osmeña, ang ubang mga kandidato sa Bando Osmeña Pundok Kauswagan (BOPK) pagka bise mayor, kongresista ug mga konsehal gi-endosar usab sa ALU-TUCP walay labot ni Nestor Archival.

Si Archival wala ilakip sa ALU-TUCP tungod kay kinahanglan sila nga mosuporta sa kandidatora ni Boobi Kintanar, ang apo ni Isidro Kintanar nga nakatabang pagkuha og prangkisa aron makatingog ang DYLA.

Matud hinoon ni Rama nga naglaum gihapon siya nga dili tanan nga sakop sa labor union ang mosunod sa awhag kanila sa ilang mga opisyal nga botohan ang tanang BOPK candidates.

Si Rama miingon nga misuway usab unta siya pag-awhag sa ALU-TUCP nga sila sa Team Rama suportahan apan karon nga ang ilang kaatbang maoy gipili, dili sila masuko ug hinoon gamiton nila kini nga rason sa paghimo pa og paspas nga kampanya. (/EIM) (BANAT NEWS)