34 ka mayor sa Sugbu misuporta ni Hagedorn

CEBU, Philippines - Gipahibalo ni Puerto Prinsesa mayor Edward Hagedorn kinsa mikandidato sa pagkasenador  nga 34 ka mga mayor gikan sa 51 ka mga lungsod ug siyudad sa lalawigan sa Sugbu ang misuporta sa iyang kandidatura.

Si Hagedorn kinsa mibisita dinhi sa Sugbu kagahapon miingon nga nakatabang ang pagka-independente niya sa pagkandidato sa pagsugod sa campaign period ug karon mas napalig-on kini human mismong si kanhi presidente Joseph Ejercito Estrada mipahibalong gisagop siya sa Partido ng Masang Pilipino (PMP) nga may kuwalisyon sa United Nationalist Alliance (UNA).

Si kanhi Compostela mayor Ritchie Wagas nagdumili hinuon sa pagbutyag si kinsa ang maong mga mayor apan mayoriya kanila mga sakop sa One Cebu Party ug duna say mga sakop sa Liberal Party, 28 kanila mga incumbent mayors sa lalawigan.

Sumala pa ni Wagas nga karong gi-endorsar na ni Estrada si Hagedorn ‘lahos-lahos’ na si Hagedorn tungod kay sa pasiunang pagpahibalo pa lang kabahin kaniya ngadto sa mga mayor 92 porsiyento na ang misanong nga mosuporta.

Si Hagedorn naila sa nasud tungod sa maayong pagdumala niya sa Puerto Prinsesa City sa Palawan nga nakapahimong numero uno sa maong siyudad sa tibuok nasud, ang pagkamapinanggaon ni Hagedorn sa kinaiyahan ug kampanya niya sa paghimong number one sa Undergound River sa Palawan aron madeklarar nga nalakip sa New Seven Wonders of the World.

Matud pang Hagedorn dako ang natabang sa mga Sugboanon tungod kay naggikan dinhi sa Cebu ang mayoriya sa 24 milyones nga boto pinaagi sa text nga nakuha dihang napili ang subterranean river nga numero uno dihang giparang sa ubang mga maanindot nga mga lugar gikan sa nagkadaiyang parte sa kalibotan.

Sumala pa ni Hagedorn nga bisan ang League of City Mayors of the Philippines pinangulohan ni Mayor Oca Rodriguez sa San Fernando City ug League of Municipalities of the Philippines pinangulohan ni Paombong, Bulacan Mayor Donato Marcos mipasalig og suporta kaniya.

Ang duha ka mga presidente sa mga liga sa mga mayor pulos sakop sa Liberal Party, maong matud pang Hagedorn  pag-abot kaniya dunay gamay nga kausaban ang baruganan sa mga local nga mga lider pagpili sa ilang senatorial candidates nga suportahan.

Apan bisan pa man sa mga suporta, wala masud si Hagedorn sa mga nag-unang surveys sama sa Social Weather Survey, Pulse Asia Survey  apan siya nagtuong dili matagna sa survey ang tinud-anay nga tingog sa katawhan base lang sa gipreparar nga mga survey questions.

“I believed in destiny, kung ano ang para sa iyo, ay para talaga sa iyo,” matud pa niya kinsa nagplanong palig-unon pa ang mga balaod pagprotiher sa kinaiyahan ug ang pag-revise sa Local Government Code of the Philippines ingon man ang Konstitusyon particular na ang gidugayon sa termino sa mga local leaders aron mas maserbisyohan og maayo ang ilang konstituwente. (BANAT NEWS)