Hapon mipamatuod, gasang gidaro sa submarino

CEBU, Philippines - Gipamatud-an sa usa ka Hapon nga mikuha og  hulagway  sa  usa  ka  yellow submarine  nga  midaro sa coral reef  kon  mga   gasang   ilawom sa kadagatan  sa Kontiki,  Brgy. Maribago dakbayan sa Lapulapu.      

 Sa usa ka press conference si Shitosi Toyoda mipakita sa mga sakop sa media sa kinatibuk-ang footage sa video nga iyang nakuha ilawom sa kadagatan sa Kontiki,  diin ang yellow submarine mibangga sa kontiki wall ug naigo ang coral reef sa maong dapit.

Matod pa ni Toyoda dili niya tuyo ang pagdaut sa negosyo sa yellow submarine sa  pag -upload niini sa YouTube kundi ang pagpakita lamang kini sa iyang mga higala sa Facebook  bahin  sa maong  hitabo.   Ang  3-minute video footage, gi-upload   sa internet niadtong Abril 24 ning tuiga human niya makuha ang hulagway niini niadtong Abril 18 dayon  ila kining gihatag sa kagamhanang lokal sa dakbayan sa Lapulapu .      

Matud pa ni Toyoda ang dili maayong pagdumala sa maong submarine ug ang delikadong kahimtang sa mga pasahero niini maoy iyang nakitang sayop ug angayang mausab  sa tagdumala sa maong negosyo.      

Samtang kagahapon sa buntag personal usab nga gisusi   ang  ilawom sa dagat  nga  gikagubtan pinaagi  sa mga sakop sa Task Force Kalikasan uban ni Andy Berame ang coordinator  sa  CFARMC uban ni Engr. Rodirico Tagaan ang dapit nga adunay danyos human mibangga ang submarine sa maong dapit.

Matud pa ni Berame   nga nakita nila  ang  mga  nangabali  nga  mga  gasang  nga nagpasabot  nga gidat-ogan  kini  og  bug-at nga  butang  ug kini mapamatud-an sa ilang  underwater camera atol sa ilang pag-dive kagahapon.    

 Gumikan niini   pahugtan  sa lokal nga kagamhanan sa dakbayan sa Lapulapu   ang  pag-monitor sa ilang kadagatan aron malikayan ang susamang panghitabo. (BANAT NEWS)