Big time drug pusher nasikop sa kapolisan

CEBU, Philippines - Usa ka  bigtime drug pusher sa probinsya sa Bohol ang nasikop sa Port Police human kini masakpi nga nagdala  og  20 ka bultong shabu  nga nagkantidad og  kapin  sa P500,000 didto  sa Pier 3 ning dakbayan  sa Sugbo  kagahapon  pasado alas 11:00   sa buntag.

Ang nasikop mao si Joselito Ras, 45, ug  ang  iyang  mga  kauban  nga  sila  si  Francisco Lalimbat, 31, ug Sisinio Ampong, 37,  pulos  taga  Guindulman,Trinidad,  Bohol. Matud pa ni Supt. Joshua Pantoja,  hepe  sa  Port Police nga ang tulo patubang na unta nga mosakay og barko  paingon sa Bohol.

 Apan  sa  didto  na kini sa frisking area , nabantayan ni Cutie Pie Flores, security  guard   sa maong  lugar nga  nagbagal ang bulsa ni Ras hinungdan nga iya kining gisita  ug gimandoan nga ipaagi  sa x-ray machine ang sulod sa iyang bulsa aron masiguro.

Didto  nasuta  ang  20 ka bultong  shabu  sa  iyang  bulsa ug  diha-diha  gisikop  dayon  sa guwardiya  ang  suspetsado, lakip  ang  duha  niini  ka  kauban. Dihang  giimbistigar, giangkon ni  Ras nga  kinompra  niya  ang  maong  shabu  sa dakbayan  sa Talisay  ug  adto  niya  kini  ibaligya  sa Bohol. Samtang ang hepe sa kapolisan sa City Intelligence Branch Chief Insp. Romeo Santander nga tungod  kay 20 ka bulto  ang  shabu  nga  dala  sa suspetsado  nagpasabot  nga  usa  kini  ka  big time  nga  pusher. Samtang sa laing bahin, laing  shabu  pusher  ang  nasikop  sa  kapolisan  didto  sa Fuente  Osmeña sa  miaging gabii. Si Rolando Mendo alyas Andoy, 28, giingong usa sa mga mamaligyaay og ginadiling drugas diha sa maong dapit, mao ray nahibilin  sa  maong  dapit  dihang  mialibwag    og  panagan  ang  mga  tawo nga  nagbilar  sa maong  higayon.

Ang  nasakmit  gikan  kang Andoy mao  ang upat  ka  tag P300 ang  matag  usa, ug  may  lain  pang pito ka paketi  nagkantidad og dosentos pesos. (BANAT NEWS)