Gikulata gipusil patay

CEBU, Philippines - Namatay  human pusila  ang usa ka construction worker sa iyang  kauban sa trabaho nga iyang gikaaway didto sa ilang trabahoan  sa   Konsult Construction Compound sa Lower Pakigne, lungsod sa Minglanilla  sa miaging  buntag. Ang biktima mao si Roland Quirante, 23, ulitawo,  lumad nga taga Paculog, lungsod sa Dumanjug,  samtang ang mga suspek mao sila si Agapito Piquero, hingkod, taga Maasin, Southern Leyte  ug Chito Piquero, hingkod, minyo nga taga Maasin, Southern Leyte ug lain pang duha   nga wala hiilhi.

Si PO2 Vincent Alinabo sa Minglanilla Police Station mibutyag  sa Banat News   nga  ang suspek nga si  Agapito Piquero nag-away ug nagsinumbagay  sa gawas sa trabahoan.

Dihang nalupig ang biktima, midagan  kini  ngadto  sa sulod  sa compound, ug  misunod  si Chito  Piquero ug  didto  mitabang  kini pagkulata sa biktima  dihang  naapsan  nila  kini.

Gumikan  kay  wala man mamatay  sa ilang  kumo  ang  biktima, usa  sa duha  ka suspek  milanit  sa iyang  armas  de fuego  ug  miluthang  sa ulo   sa  biktima.

Dihang nahagba  sa  yuta  ang  biktima nag-iyahay  og  panagan  ang  tulo ka  suspek  pahilayo  sa maong  lugar .

Samtang ang biktima gisuwayan pa unta paghatud   ngadto sa Minglanilla District hospital apan gideklarar   kini  nga patay  na.

Padayon  pang  gipangita  sa kapolisan  ang  mga  suspek. (BANAT NEWS)