Mike miterorismo sa mga konsehal-Tommy

CEBU, Philippines - Gihulagway ni Kongresista Tomas R. Osmeña  si Mayor Michael Rama miterorismo dihang gihulga niini nga pasakitan ang presidente sa kahugpongan sa mga konsehal sa barangay tungod lang kay wala siya tugoti nga makadiskurso atol sa  usa ka kalihukan.

Wala mohatag og posible nga rason si Osmeña kun ngano nga gihimo kadto ni Rama nga nasuko, sa  hukom   sa mga opisyal sa Barangay Councilor’s League of the Philippines (BLCP)-Cebu City Chapter   nga walay  kandidato nga pasultihon atol  sa ilang  tigom.

Si Osmeña mitataw nga giimbitar gani siya sa mga opisyal sa maong kahugpongan,  apan  wala  siya  motambong  bisan  nakahatag siya  niini  og P3 milyones nga hinabang-salapi   alang  sa  mga  kalihokan  niini.

Matud ni Tejero Barangay Konsehal Garry Lao nga secretary sa kahugpongan nga gitarung nila pagpasabot ang mayor  nga igo  lang  siyang  motambong apan dili siya tugotan sa pagdiskurso.

Si Lao miingon nga gusto unta sa mayor nga ipahibalo sa dul-an sa 400 ka konsehal nga mitambong sa kalihukan nga gipirmahan na niya ang paghatag na usab og dugang honoraryom alang sa mga opisyal sa barangay.

Matud ni Lao nga nahukman ni Kasambagan Barangay Konsehal Franklin Ong, ang presidente sa kahugpongan, nga dili gayud nila tugotan ang mayor nga makadiskurso kay para patas sa ubang kandidato.

Ang mayor matud pa nasuko ug misuntok sa iyang pikas kamot ug misaad nga iyang suntokon si Ong kun magkita sila pag-usab.  Hinoon si Rama kusganong nanghimakak sa maong pasangil.

Si Ong gikareport usab nga miluwat og pamahayag nga wala siya malisang kun mahitabo nga tinud-on sa mayor ang iyang bahad. (BANAT NEWS)