CCTV operator sa mall gitumbok nga mikulata sa tinun-an

CEBU, Philippines - Gibabagan sa pamilya sa gipasanginlang nangawat og sandals kinsa namatay samtang gikostudiya sa mga gwardiya sa usa ka department store sa dalan Colon, ang pagpasaka og kaso sa usa sa mga gwardiya nga giingong mikulata biktima.

Ang gikasohan unta sa Homicide Section sa Cebu City Police Office mao si Jeffrey Aquino, ang closed-circuit television (CCTV) camera operator sa Gaisano Metro kinsa maoy gikatahong gitumbok sa mga kaubanan nga maoy mikulata sa biktimang si Mario Alfie Ducayag niadtong Abril 12 ning tuiga. Gidala na unta kagahapon sa City Prosecutors Office sa kapolisan si Aquino aron kasohan og homicide apan wala kini mahinayon.

Giingong nadakpan si Aquino kagahapon human siya maoy gitudlo nilang Mauricio Dablados, head sa security group, Melvin Boyles, house detective sa maong tindahan ug si Arnel Tanudra kini base usab sa  ilang gibuhiang pamahayag sa ilang affidavit nga si Aquino gyud ang misumbag ug misikad sa biktima.

Matud pa ni Natuel nga sa una, gitago sa mga gwardiya ang tinud-anay nga nahitabo hangtod nga giingong nakonsensya sila ug miluwat og pamahayag. Apan giklaro ni Natuel nga dili gihapon sila exempted kung makit-an sa  imbestigasyon nga apil sila pagdagmal ni Ducayag.

Gipasabot usab ni Natuel nga wala sila manglawgaw sa imbestigasyon sa National Bureau of Investigation (NBI) tungod kay igo ra sila naghimo sa ilang trabaho. Niadtong Domingo, gihatod na sa katapusang pahulayan ang patay’ng lawas ni Ducayag.

Ang igsuon ni Ducayag nga si Marie Shantylle nga mipatim-aw sa CCPO aron hangyoon nga ang NBI nalang ang mopadayon sa kaso tungod kay gusto nila nga ang tanang responsable mao gyu’y masikop.

Si Cerwin Eviota, tigpamaba sa maong establisamento miawhag sa NBI ug kapolisan nga mas palawman pa ang imbestigasyon aron gyud mataral ang tanang responsable sa kamatayon sa biktima.

Mapasalamaton usab ang Metro Retail group sa kalamboan sa maong kaso nga adunay nasayrang responsable aron mogawas ang kamatuoran. Gipasabot usab niini nga ang ilang buhatan wala magkulang sa pagpahimangno sa ilang mga trabahante ug sa mga gwardiya.  (BANAT NEWS)