Australian sikop tungod sa porno
CEBU, Philippines - Usa ka Australian ang pasakaan og kasong Qualified Trafficking, Child Abuse ug Anti-Pornography Law human ma-rescue sa mga sakop sa National Bureau of Investigation -7 ang duha ka menor de edad nga dalagita ug usa ka babaye gikan sa lawak niini.
Ang Australyanong si Keith Robert Hutton nadakpan niadtong miaging Sabado sa Room 314, ACE, Pensionne Hotel, M.L. Quezon National High way, Pajo, Lapu-Lapu City.
Base sa imbestigasyon sa NBI, duha ka menor de edad nga edad 16 ug 17 ug usa ka babaye ang anaa sulod sa kwarto kauban si Hutton. Nakuha gikan sa lawak ang mga CD, laptops ug digicam nga adunay pornographic pictures, nude female minors nga naghimo og sexual acts.
Giklaro usab ni NBI-7 director Atty. Antonio Pagatpat nga walay search warrant ang maong operation tungod kay nag-commit na kini og krimen sa ilahang pag-rescue sa mga bata ug violation ang gibuhat sa maong langyaw sa Republic Act. 7610 o attempt to commit prostitution.
Matud pa sa usa sa menor de edad nga biktima, makig-sex kanila si Hutton ug gihatagan sila niini og kwarta, cellphones ug mga groceries. Gitataw sad ni NBI special investigator Sixto Espenesin Jr. nga notado na ang subject sa pagdumala og mga ilegal nga binuhatan sa lungsod sa Cordova ug Lapu-Lapu.
Ang pagkasikop kang Hutton nagsumikad sa request ni Senior Officer Jane Dickinson sa Australian Federal Police pinaagi sa Austalian Embassy sa Pilipinas kabahin sa binuhatan ni Hutton didto sa ilang nasud.
Matud ni Espenesin, giimbestigahan niya ang aktibidad ni Hutton ug nag-abang siya atubangan sa kwarto sa subject ug siya mismo nakakita nga magsige og sulod ug gawas ang mga babaye sa kwarto sa langyaw.
Ang mga biktima ipasa sa NBI ngadto sa kustodiya sa Department of Social Welfare and Development. (BANAT NEWS)
- Latest
