Napriso gumikan sa shabu naghikog

CEBU, Philippines - Patay nang nakit-an sa  iyang  kapuyo  ang usa ka  ulitawo nga naghikog   gumikan  sa pagkonsimisyon sa  iyang  kaugalingong  problema didto sa usa  ka  payag sa barangay Tungkop sa lungsod sa Minglanilla sa miaging buntag.

Ang nagpakamatay mao si Joel Cavan, 22, ulitawo, apan adunay kapuyo  nga  ginganlan  og Emily dela Victoria, hingkod.

Si PO1 Wilmar Camposa Minglanilla Police Station mibutyag  sa Banat News   nga nasayran  nila  nga  si Emily,   ang  live-in partner ni Cavan  maoy  nakadiskobre  sa  paghikog  sa naulahi.

Matud  pa  nahibulong si Emily  nga wala  mopauli  sa ilang  balay    ang  iyang  kapuyo,  busa  gisusi  niini  ang  usa  ka bakanteng  payag  nga  kasikbit  sa ilang  balay  ug  didto  nakita  niini  nga nagbitay  na  si  Cavan  nga  wala  nay  kinabuhi  kansang  liog  gihigtan  og  pisi  nga  gigaid  sa sakbayan  ang  pikas  tumoy.

Dugang nahipos  nga inpormasyon sa kapolisan nasuta nga ang biktima gibati   og tumang kaguol human madakpi ug  napriso pipila ka buwan na ang milabay tungod sa paghupot  og gidiling drugas.

Nakagawas  kini  sa bilanggoan  pinaagi  sa pagbayad  og  piyansa.

Gibutyag  ni  Emily  nga  human  kini  makagawas  sa prisohan nagpunay  nalang  kini  og  hinuktok   gumikan sa kaguol  kay  gikauwaw  niya  ang  nahitabo  kaniya.

Mao  kini  ang  gituohang  hinungdan  sa paghikog  ni Cavan.  (/WC)  (BANAT NEWS)