Tresurero sa brgy, giligid og tigbas sa ig-agaw

CEBU, Philippines - Kritikal ang kahimtang sa usa ka tresurero sa barangay human kini ligira og tigbas sa iyang ig-agaw nga gikaaway   niya sa inuman didto sa Sitio Biasong, barangay Lanao, lungsod sa Dalaguete, kagahapon sa alas 2:30 sa kaadlawon.

Ang biktima mao si Alexander Dicdican, 43 , minyo, ug  tresurero sa maong barangay,  samtang ang suspek mao si Marcial Amaba, 49, ulitawo, ug ig-agaw  sa biktima nga nagpuyo ra usab sa maong dapit.   

Si SPO1 Veronico Centino sa Dalaguete Police Station mibutyag  sa Banat News   nga  ang biktima ug ang suspek uban sa ilang mga higala nag-inom sa  maong  higayon  apan dihang nangahubog na mitumaw ang panaglalis sa suspek ug  sa uban niining gika- inom.

Ang biktima nga mibati  og  kahingawa, mipatunga aron maundang ang maong lalis.

Dihang  nahunong  ang  lalis  mipauli na  ang biktima apan wala magdugay   dihang   mibalik   siya  ngadto  sa ilang  giinoman, wala  siya  makabantay  nga  giatangan  diay  siya  sa suspetsado  kinsa  hilom  nga nasuko  kaniya.

Didto   giligid  kini og  tigbas   sa suspetsado  ug gibinlan  nalang  og  gamay  nga  kinabuhi dihang  nabulit  sa mga  samad tinigbasan  ang  lawas  niini  gikan  sa abaga, tiyan, buko-buko,  bukton, bitiis  ug  uban  pang  bahin  sa lawas nga nasabak  sa sundang  nga gigamit  sa suspek   paghabas  kaniya.

Dihang  nahagba  sa yuta  ang  biktima  ug  naligo na  sa dugo   nagtuo tingale  ang  suspetsado nga  patay  na kini, dali kaayo  kining   mibiya  sa maong  lugar.

Ang biktima gitabang sa mga tawo nga naagi sa maong lugar ug gihatod   ngadto  sa Cardinal Rosales Hospital sa lungsod  apan gi-transfer   kini sa tambalanan dinhi sa dakbayan. Ang suspek padayon  pang  gipangita  karon  sa kapolisan  aron kapasakaan  og  sumbong. (/WC)    (BANAT NEWS)