Metro Cebu mahatagan og bag-ong mga firetrucks

CEBU, Philippines - Dugang fire fighting units ang gipaabot nga mangabot alang sa Bureau of Fire Protection-7 ilabi na sa dakbayan sa Sugbo, Mandaue, Lapu-Lapu, ug Talisay nga gikan sa gawas sa nasud.

Ang dakbayan sa Sugbo sa dili madugay makaangkon og fire truck nga ihatag sa mga opisyal sa Yeosu City, South Korea isip kabahin sa panagsuod sa duha ka dakbayan.

Gihatagan na og pagtugot sa Cebu City Council si Mayor Michael Rama nga makapirma og dokumento pagdawat sa maong mga trak sa bombero nga adunay water tank capacity nga 2,800 litros. Ang mayor sa Yeosu City nga si Kim Chung-Sweog miingon nga ang katawhan sa ilang dapit gusto nga mohatag sa maong firetruck alang sa dakbayan sa Sugbo aron pag-abag pa sa iyang paglambo.

Si Mayor Rama miingon nga tukma kaayo ang pagdonar og firetruck sa dakbayan sa Sugbo tungod kay nangaguba na ang ubang mga trak sa kabomberohan sa siyudad.

Mahinumduman nga dili pa dugay, ang Cebu City fire department gihatagan usab og bag-ong firetruck sa Bureau of Fire Protection apan sa gihapon kuwang gihapon ang atong trak sa bombero.

Naiban-ibanan ang problema sa BFP sa siyudad tungod kay gawas nga adunay mohatag sa dakbayan, duna pay mga dagkong kompaniya, fire volunteer brigades ug mga barangay nga may kaugalingong fire fighting equipment. Samtang gipahibalo sa kadagkoan sa BFP-7 nga dunay 38 ka mga bag-ong firetrucks nga maabot dinhi sa Pilipinas ug ang upat niini ihatag sa Cebu City, Mandaue, Talisay ug Lapulapu.

Ang maong mga firetrucks mao ang Rosenbauer TLF 4000 nga gikan sa Austria nga adunay 1000-gallon water pumper.

Aduna kini  240 horse power water-cooled engine nga nakasumpay sa water pump  aron makasaka sa mga subidahong dapit bisa’g daghan ang pasahero  ug dili na maglisod sa pagresponde ang mga bombero. Gawas niini, aduna pud kini upat ka pultahan , 7-passenger seat capacity, air conditioner, ug may kapasidad nga makapasirit og 2,400 ka litro nga tubig kada minuto.

Adunay duha ka mga gagmay’ng hose ang kada kilid sa truck nga built-in aron dili na mahasol ang personnel og taod sa hose ngadto sa nozzle.

Matud ni Snr. Insp. Ethel Margaha  nga dako gyud ang kalainan sa bag-ong firetrucks karon kung itandi sa mga firetrucks nga ilang naandan nga gamiton.

“It has a strong water cannon that can push water up to 62 meters horizontally and 24 meters vertically equivalent to an eight-storey building, ang iyahang intervention hose magamit usab as chemical suppressants, which is very crucial in fighting off fire caused by chemicals,” pasabot pa ni Margaha.

Aduna usab fire lockers ang firetrucks aron dali ra ang pag-rescue sa mga biktima ug pwede usab kini makakuha og tubig gikan sa water hydrants.  Adunay gisubay nga criteria ang Official Development Assistance aron sa paghatag og firetrucks matag lungsod .

Giklaro usab ni Margaha nga giuna og hatag ang mga urbanized areas ilabi na ang mga lungsod nga adunay mga taas nga buildings. Dugang pa ni Margaha nga i-turnover na karong Lunes sa hapon , Abril 29,2013 sa Ayala Center Grounds  ang upat ka mga firetrucks sa upat ka dakbayan.  (BANAT NEWS)