Nawong sa tanod napikas

CEBU, Philippines - Maayong pagkapikas sa nawong sa usa ka barangay tanod human gitigbas sa ilang silingan nga giingong kawatan og manok didto sa bukirang bahin sa Sitio Talamban barangay Bulak, lungsod sa Dalaguete.

Nalandig sa tambalanan ang tanod nga si Honorato Entoma, 37, tungod sa pagtigbas sa suspek nga si Porferio Cadiz.

Base sa imbestigasyon sa Dalaguete Police Station, duna nay panagbikil ang duha tungod kay nagduda ang biktima ug ang mga silingan nga si Cadiz maoy responsable sa pagpangawat og mga manok sa ilang dapit.

Matud pa nga samtang nagpahangin sa gawas sa ilang balay kalit nga miabot ang suspek ug walay daghang pasumangil gihapsan og pinote ang biktima sa liog apan swerteng nakalihay og gamay ang biktima ug naigo siya sa nawong lakip na sa ilong.

Human niini daling midagan ang suspek palayo sa dapit samtang gidala sa tambalanan ang tanod.

Sa laing bahin, usa ka lalaking akusado sa kasong murder ang gipusil sa wala mailhing lalaki samtang nagtan-aw og variety show sa miaging gabii  diha sa sitio Cogon, Barangay Poblacion 1, sa dakbayan sa Carcar.

Ang naangol ug talandugon ang kahimtang giilang si Mark Alinton ,19, taga sitio Tugas, barangay Bolinawan sa maong siyudad.

Sumala pa sa report, ang biktima nakaangkon og samad pinusilan sa dughan nga milapos sa bukobuko.

Dako ang pagduda sa kapolisan nga posibleng atraso ug may kalambigitan sa krimen nga iyang nahimo ang pagpamusil sa biktima.

Sumala pa nga napasakaan og kasong murder ang biktima sayo ning tuiga tungod sa pagpatay sa iyang silingan apan wala madakpi kay nakaeskapo apan gipasakaan gihapon kini og kaso sa maong krimen.  (BANAT NEWS)