Soco mihagit ni Magpale pagtug-an sa tinuod

CEBU, Philippines - Gihagit ni vice gubernatorial candidate Glen Soco si acting governor Agnes Magpale nga motug-an lang sa tinuod nga panghitabo sa Milabay’ng anniversary sa mga sakop sa barangay Health Workers  sa lungsod sa Barili diin una nang gika-report nga nangilog   siya og  microphone  ni Soco.

Matud ni Soco atol sa interview sa Banat News, andam  siyang  mopaubos  sa lie detector test aron mahibaw-an kun si kinsa ang nagsulti sa tinuod. Si Soco mitataw nga kun imbitado si Magpale sa maong kalihukan labaw na  siyang  imbitado niini ug gani didto  na siya sa gym  sa ala 1:40  sa hapon   diin  gisugat  sila  sa init  kaayong  pag-abi-abi sa  mga  sakop  sa BHW. Unya  nanglamano  siya  sa  tanan  nga nanambong  sa kalihokan   ug  mahinangpon  kaayo  ang  tanan  nga  nagpa-retrato  uban  kaniya.

Human  makapanglamano  ug  makapakuha  og  hulagway,  gitawag  siya  sa emcee  aron makapamulomg  apan  sa dayon  niyang  saka  sa   entablado  naabot  usab  si  acting  governor  Magpale  ug  nagdali  nga  misaka  sa stage  dayon  gilabni  ug  giilog  ang  microphone  gikan   kaniya.

Dugang ni Soco nga  iya  pa  unta nga gisuwayan og lamano ang acting governor apan wala siya tagda niini atubangan sa gatosan ka mga BHW nga nanambong.

Alang kang Soco nga bisan   unta   kun  gihatagan siya og higayon nga makaestorya, agi   og  respito tungod kay pareho  man silang imbitado ilabi  na  una  siyang  miabot  didto .

Si Soco mitataw nga   usa  sa lig-on  niyang  saksi  sa maong  panghitabo  mao  mismo  ang presidente sa BHW nga  si Avelina Ugaob  ug  ang tanang  sakop  niini  nga  mitambong  sa kalihokan.

Si Magpale   sa  sayo pa unang mipasabot nga wala siya mangilog og microphone ni Soco sa maong   higayon. (Darrel A. Carumba/WC) (BANAT NEWS)