“Pusher” patay sa shootout
CEBU, Philippines - Patay ang usa ka giingong notadong drug pusher sa barangay Babag sa siyudad sa Lapulapu human makigpinusilay sa mga sakop sa City Anti Illegal Drugs Operations Task Group sa Lapulapu City Police Office kagahapon sa hapon.
Padayon pang giila sa mga imbestigador ang napatay nga suspek nga naila pa lamang sa pangalang alyas “Shaman†kinsa giingong nag-operate og drug den nga usa ka gamay nga langub sa sitio Takan sa barangay Babag.
Nadakpan usab sa kapolisan ang duha ka mga giingong kauban niini nga sila si Sandy Casul, 36, residente sa maong dapit ug Amadeo Villanueva Abad, taga sitio Kinalumsan barangay Gun-ob sa samang siyudad.
Matud pa ni Sr. Supt. Rey Lyndon Lawas, city police director sa LLCPO sa pakighinabi sa Banat News sa telepono si Shaman ang nagpayuhot og illegal nga drugas diha sa maong barangay.
“Iyaha nang teritoryo ang barangay Babag. Ang atong info (information) nga nadawat sa gawas sa Lapulapu City gikan ang iyang source (sa shabu),†matud pang Lawas.
Ang mga sakop sa CAIDSOTG nga mihimo sa buybust operation gipangulohan ni Sr. Insp. Rogelio Pineda mipalit og balor P600 nga shabu gikan sa napatay nga suspek apan nakabantay kining polis ang iyang gika-transaksyon ug kalit nga namusil. “Pagkontra-senyas sa poseur buyer didto na siya nakig-engage sa atong CAIDSOTG,†matud pang Lawas.
Ang suspek giingong naigo na sa bala apan nakalayat pa kini sa sapa ug milangoy tabok ngadto sa lungsod sa Cordova hinungdan nga gibagat kini sa mga polis ug napalgan nga nagbuy-od sa barangay Pilipog sa maong lungsod.
Dali kining gidala sa Lapulapu City Hospital apan gideklarar kining patay na. Adunay samad pinusilan sa tiyan ug tiil si Shaman nga nakaingon sa iyang kamatayon.
Nakuha gikan kaniya ang 26 ka putos nga gidudahang shabu, usa ka kalibre .38 rebolber nga may duha ka buhing bala ug tulo ka basiyo sa sud sa tambor niini, gituohang drug money nga P6,330, ug ang buybust money nga P600.
Matud pang Lawas nga dunay mga nakuhang drug paraphernalia diha sa gamay nga kubol-kubol ug langub nga gihimong suyopanan.
Sumala pa ni Lawas aduna pay follow-up operation nga gihimo karon ang LLCPO kalabot sa maong kaso. (Edwin Ian Melecio ug Bong Soriano/EIM) (BANAT NEWS)
- Latest
