P200 mil ipremyo sa makatug-an sa mipatay ni Lauro

CEBU, Philippines - Mitanyag  og P200 mil  nga premyo   ang  mayor sa Masbate  alang  sa makatug-an  sa killer  nga mipatay  sa iyang  asawa   dinhi sa Sugbo  sa miaging  semana. 

Matud  pa  ni Sr. Supt. Mariano  Natuel, hepe  sa kapolisan  sa dakbayan  sa Sugbo   nga  dako  og  ikatabang  sa kasulbaran  sa maong  kaso  ang  reward  money  nga  gitanyag  ni Mayor Herminigildo  Betonio III, sa lungsod  sa Pio V. Corpuz  sa lalawigan  sa Masbate  nga  maoy  kapuyo  sa namatay  nga  si  Crisanta  Lauro.      

Apan gipadayag ni Natuel nga dili  kalikayan  nga  gumikan  sa maong  tanyag   daghan  na  unya  ang  motumaw  nga  magpatuyang  lang  og  hatag  og  impormasyon  sa kapolisan bahin  sa  ngalan  sa criminal   hinungdan nga matud  pa  ni  Natuel  nga ila pa gayud   hagpaton  ug saon  pag-ayo  ang  mga  impormasyon  nga  ilang  madawat  aron  masiguro  nga kadto  rang  makatug-an  sa tinuod  nga  criminal maoy  makadawat  sa maong  premyo.   Gipasalig usab ni Natuel nga dili sila magpataka  og  dawat  og  mga  kasayoran  bahin  sa maong  isyu  kundi  ilang  himoon  una  ang  background   check   sa  tawong  mopadala  kaniya  sa   impormasyon  pagsuta  sa  kridibilidad   sa  ilang  report.      

Kahinumdoman nga niadtong  Abril 15, namatay  diha-diha  si Lauro human  kini  pusila  sa wala  hiilhing  criminal  nga  nag-angkas  og  motorsiklo  samtang  mihunong ang gisakyang   taxi  sa   biktima  sa  may  traffic  light sa dalan sa barangay Tinago,  ning  dakbayan. Samtang  si Konsehal Lenny  Eser   sa Pio V  Corpuz,  nga  igsoon  ni  Betonio  ug  kuyog  ni  Lauro  luwan  sa taxi  nasamdan  sa kamot  sa maong  pagpamusil.       

Si Lauro  nasabak  sa dughan ug ulo  nga  maoy  hinungdan  sa hinanali  niyang  kamatayon. (BANAT NEWS)