Shoplift namatay sa bun-og – NBI

CEBU, Philippines - Giklaro ni Regional Director Atty. Antonio Pagatpat sa National Bureau of Investigation (NBI) nga ang findings sa ilang medico legal officer nga si Dr. Rene Cam maoy ilang basehan sa imbestigasyon ug dili ang imbestigasyon sa Philippine National Police bahin sa gipasanginlang shoplift nga namatay  sa kostudiya sa gwardya sa dakong department store  ning  dakbayan  sa Sugbo sa miaging semana. Sa interview sa Banat News, giklaro ni Cam nga  dili specific o dili  klaro  ang resulta  sa awtopsiya  sa  PNP   itandi  sa nasuta  niya  sa  lawas  patay  sa  biktima  nga  si  Mario Alfie Dacuyan,  kinsa  nadakpan  sa  mga  security  guard  sa usa ka  tindahan  sa downtown  area  ning  dakbayan  sa Sugbo  nga giingong nangawat niadtong  Abril 16 ning tuiga.

Matud  pa  ni  Cam  nga  segun  sa findings  sa kapolisan,   nga namatay  ang  biktima  sa natural  nga  kamatayon  kay nahutdan og  hangin. Apan  sa iyang  findings,  miingon  si  Cam  nga  iyang  nasuta  nga  ang namatyan sa biktima  mao   ang  hilabihang  kabun-og    sa lawas niini  diin  ang  mga  bukog  sa iyang  dugokan  nangahiwi,  ang usa ka baga nahagsa, samtang  ang liog  ug  ang  iyang  abaga  hangtud  sa bukton  nasugamak  sa grabing  mga  bun-og  nga  maoy  nakaingon  sa  pagkapalyar  sa iyang  ginhawa.  (BANAT NEWS)