Merkado sa Tabunok buksan pagbalik

CEBU, Philippines - Human sa pagtugot sa subling pagbukas sa terminal sa traysikol diha sa Tabunok gikatakda na usab ang pagpabalik sa mga vendor gikan sa merkado sa Lagtang diha sa daang merkado sa Tabunok.

Si Talisay City Public Information Officer, Arturo Bas nga nahinabi sa Banat News kagahapon mibutyag nga kagahapon sa ala 1:30 sa hapon si Gullas ug mga opisyal sa siyudad nakigtigom sa mga vendor diha sa buhatan ni Mayor Socrates Fernandez.

Matud ni Bas nga gikonsulta sa kongresista ang mga yangu-ngo sa vendors.

Ang mga vendors nalipay nga ibalik sila sa daang merkado sa Tabunok apan mihangyo silang ayohon una ang estraktura sa daan merkado tungod kay guba na kini ug delikadong mahagsaan sila sa mga dapat sa building.

Gawas niini ang mga vendor sa fish section mihangyo usab nga sama sa Lagtang butangan og tagsa-tagsa ka mga gripo ang mga stall, ipataud ang linya sa kuryente ug ipaayo ang drainage sa merkado.

Gibutyag ni Bas nga miuyon niini ang kongresista ug gikatakdang ipasusi sa city engineering ang daang merkado sa Tabunok.

Matud ni Bas gipasusi usab sa kongresista kung duna bay kasamtangang proyekto ang siyudad ug ikonsulta nila kini sa Comelec kung pwede bang gamiton ang budget niini ngadto sa pagpaayo sa daan merkado.

Matud usab ni Bas nga tungod sa election ban dili basta-bastang makapagawas og budget ang siyudad alang sa proyekto.

Apan kung dili tugotan sa Comelec ang plano sa kongresista gikatakdang human sa eleksiyon na ipaayo ang daang merkado. Ang nahisgutang tigom natapos kini mga alas 3:40 sa hapon.

Sa laing bahin, kagahapon ang mga vendor diha sa fish section nagkanayon kini nga tungod sa kahinay sa ilang halin nagkaanam na sila og kagamay.

 Kaniadto kapin sa 200 ang ilang gidaghanong mga vendor sa isdaan apan karon wala na makaabot sa 100 ang ilang gidaghanon.

Matud nila nga kasagaran nilang mga kauban nangundang na og paninda tungod kay dili na makadata sa ilang giutang nga puhonan tungod kay kanunay’ng alkanse sa kahinay sa halin. (BANAT NEWS)