Paggasto ni Rama alang basketball uniforms gikwestyon ni Margot
CEBU, Philippines- Giawhag ni Konsehal Margarita “Margot†Osmeña ang Commission on Audit (COA) aron susihon kun tukma ba ang gihimo ni Mayor Michael Rama nga paggasto og dul-an sa P2 milyones alang sa basketball uniforms unya ang pundo adto kuhaon sa ubang gahin.
Giawhag ni Konsehal Osmeña si Cebu City Auditor, Cymbeline Celia Uy nga pahibaw-on siya kun unsay sangpotan sa ilusad niya nga imbestigasyon kabahin sa paggasto sa dakbayan og P1,999,750 para ibayad sa pagpatahi og 6,000 ka sets sa basketball uniforms.
Ang Angel’s Sportswear maoy gikataho nga nakadaug sa subasta pag-suplay og basketball uniforms nga ihatag sa mga basketball players nga mangayo’g uniporme gikan sa City Hall.
Ang pag-kwestyon ni Osmeña nagumikan kay ang pundo nga kuhaan sa bayad adto man kuhaa sa Account 1011-1-765-023 kon Other Supplies and Materials-Programs and Other Activities ubos sa Office of the Mayor.
Matud sa konsehal dunay pundo nga gitagana alang sa mga sports activities mao nga nahibulong siya nganong ang maong pundo adto man ibanon sa gahin nga gitagana sa lainlaing opisina.
Ang pundo adto ibanon sa pundo nga gitagana sa Private Sector Organization Evaluation and Monitoring Program, Coastline Management Board, Cooperative Development Program, Anti-Squatting and Demolition Program, Cebu Environmental Sanitation Enforcement Team, Office of Senior Citizen, Comprehensive Land Use Plan ug Operational Budget for City Development Council.
Si Mayor Michael Rama miingon nga ang pagkwestyon ni Osmeña sa iyang mga proyekto klaro kaayo nga adunay kalambigitan sa politika ug wala siya mabalaka niini. (BANAT NEWS)
- Latest
