Estudyante sa USC gipasidunggan sa taga Mandaue

CEBU, Philippines - Ang paghatag og pasidungog sa usa ka tinun-an nga gipasigarbo sa mga Mandauehanon maoy nakahatag dugang kamabulokon sa ika -122 ka tuig nga kasaulogan sa adlaw nga natawhan ni anhing Chief Justice Sotero B.  Cabahug nga gipahigayon didto sa Mandaue City Sports and Cultural Complex sa sitio Tribunal sa barangay Centro sa dakbayan sa Mandaue.

Ang gipasidunggan sa maong adlaw mao ang tinun-an sa  Univesity of San  Carlos (USC) nga si Anne Mae  Sarra nga migraduwar sa BS-Pharmacy sa miaging Marso niining tuiga nga summa cum laude.

Ang pagtunol   kang Cabahug  og  medalya  naandan  nga kabahin sa kasaulogan   sa birthday ni Justice Sotero Cabahug matag  tuig. Kini  sa tinguha  nga  mohatag  og  kadasig  sa  mga  tinun-an  sa dakbayan  nga  manlimbasug  nga  molampos  sa ilang  pagtuon  aron  usab  sila kapasidunggan  sa  kagamhanan . Si  anhing  chief  justice Sotero Cabahug gawas nga nahimong  hepe sa korte suprema, nahimo usab kining kongresista sa Sugbo, gobernador ug mayor sa dakbayan sa Mandaue .

Sa  iyang panahon nagbilin usab og  mga handumanan  nga napuslan  kaayo  sa  mga  Sugboanon  hangtud  karon  sama  sa Capitol  building  sa dakbayan  sa Sugbo  ug  ang   Mandaue City Hall.  Si Mayor Jonas Cortes ug Bise Mayor Glenn Bercede mao usab ang nangulo  sa mga opisyal  ug  kawani sa kagamhanan sa maong dakbayan  sa pagtambong  sa kalihokan  sa maong  kasaulogan  uban  sa   paghalad og pongpong sa mga bulak sa estatuwa niini nga gipahimutang sa luyong bahin sa City Hall.

Si Mayor Cortes mao usab ang nangulo sa gipahigayon nga testimonial dinner didto sa Mandaue City Sports and Cultural Complex  diin usab gipahigayon ang 6th Justice Sotero Cabahug Memorial Lecture. (BANAT NEWS)