Taxi driver miuli sa mahalong relo

CEBU, Philippines - Usa ka relo  de pulso  nga nagkantidad og P411,000 ang gi-uli sa duha  ka taxi driver    ngadto sa Waterfront Police Station 3,  nga nahimutang sa  barangay San Roque, siyudad sa Sugbo kagahapon sa hapon.

Si PChief Insp. Wildemar T. Tiu, hepe  sa Waterfront  Police Station  miila  sa tag-iya  sa maong relo nga  si Alejandro Jabonillo Guantero Jr. taga Poblacion 2, Oroquita City ug  usa  ka negosyante  kinsa  misuroy  lang  nganhi  sa dakbayan  sa Sugbo.

Samtang  ang  miuli  sa  maong  relo  ngadto  sa kapolisan  sa Waterfront   mao  sila si Rolando Mercader Conde   ug  Joel  Mercader Conde, pulos  mga  hamtong,  nga  taga sitio  Horse Shoe Drive ug  sitio  Daquit,  pulos sa barangay Guadalupe ug  mga  driver  sa MCG Taxi 

Sumala  pa  ni PChief Insp Tiu  nga  niadto pang Abril 18 ning  tuiga gi-report  ni Guantero  ang pagkawagtang  sa  iyang  relo ngadto  sa kapolisan  sa maong  buhatan.

Gibutyag  ni   Guantero nga naglakaw  siya kauban sa iyang pamilya sa may barangay Tinago, ning dakbayan sa maong  adlaw  dihang kalit lang  nawagtang  ang  iyang  relo  gikan  sa iyang  bulsa.

Ang  maong relo  nga  usa  ka  Rolex Oyster Wristwatch  nagkantidad og P411,000 nga gituohan  ni Guantero   nga  gikuot   sa  wala  hiilhing mangunguot sa maong higayon. 

Apan  kagahapon sa hapon gihatud   ang maong relo sa managsuong Conde kinsa misaysay nga nagpahugas  sila sa ilang sa taxi dihang  nakit-an nila  ang usa ka relo de pulso  sa sulod  niini.

Nahinumdoman  ni  Rolando  nga  niadtong Abril 18  may  pasaherong  misakay sa  iyang  taxi sa dapit  sa pier area.

Gumikan  niini  gitawag  dayon  sa kapolisan  ang tag-iya niini  nga  si Guantero  kinsa  diha-diha mikuha  usab  dayon  sa  maong  relo  human  makapresenter  og  tukmang  mga papeles  niini.  (BANAT NEWS)