P400 mil danyos sa sunog sa Liloan

CEBU, Philippines - Lima  ka establisemento  ang  naugdaw  lakip  na  ang  usa  ka pawnshop  ug  duha  ka  karenderia   dihang  miulbo  ang  sunog  didto  sa   barangay Poblacion sa lungsod sa Liloan kagahapon  pasado ala 1:00 sa kaadlawon      

Si SFO2 Bob Bolabola sa kabomberohan sa maong lungsod  nga nahinabi sa Banat News miingon nga ang  edipisyo nga  naugdaw  gipanag-iya nila ni Nita Mendoza ug Ester Balberde.

Si SFO2 Bolabola miingon nga ang maong sunog nga ilang gipaubos sa second alarm   nakontrolar sulod sa duha ka minutos ug milungtad usab og tulo ka oras nga gidugayon sa ilang pagpawong niini.

Matud pa niya nga ilang gibanabana nga mokabat sa P400,000 ang gibilin nga danyos sa maong  sunog apan wala  nila matataw ang hinungdan niini.

Si SFO2 Bolabola midugang nga ang mga tag-iya sa carenderia ug uban pa nga nag-okupar  sa maong edipisyo  ilang ipatawag sa ilang buhatan aron  kakuhaan  kini  og  dugang  pamahayag.

Samtang  si FO3 Rolando Capoy, fire investigator  sa Liloan Fire Department  nagkanayon  nga ang kalangay  sa  pagpawong  sa kuryente,  maoy  nakalangay  usab  sa kabomberohan  sa pagpawong  dayon  sa kayo.

Hinuon  walay  kinabuhing  naangol  ug  nakalas  ug  padayon  pang   gihimo    sa kabomberohan   ang  imbistigasyon   sa maong  hitabo. (BANAT NEWS)