Amerkano gigapos sa mga tulisan

CEBU, Philippines - Usa ka 70-anyos nga American national ang gigaid ug gitaptapan og masking tape ang baba niini sa tulo ka wala mailhing mga kawatan niadtong Lunes sa buntag diha sulod sa iyang gipuy-an nga apartment sa Santa Catalina Village, sitio Ilang-ilang, barangay Lagtang, dakbayan sa Talisay. Ang biktima mao si Robert Lero, usa ka black American nagpuyo sa maong dapit.  Ang silingan ni Lero nga si Mercilinda Go maoy mi-report sa mga polis kabahin sa maong hitabo.

Sa imbestigasyon sa kapolisan, naabtan sa mga silingan ang biktima nga gigapos ang mga kamot ug mga tiil nga sama sa baboy ug gitaptapan og masking tape ang baba niini.

Giingong miluag ang masking tape sa baba sa biktima hinungdan nga nakasinggit siya pagpangayo og tabang sa mga silingan. Sila si SPO2  Mikie Espina, SPO1 Rolando Bastida, PO3 Benedicto Lasque, PO1 Erwin Denila ug PO1 Ranulfo Villaver ang daling miresponde sa maong insidente. Si Lero dunay gitaod nga Close Circuit Television (CCTV) cam diha sa iyang apartment hinungdan nga nakita ang mga kawatan ug ang gibuhat nila ngadto kaniya.

Giingong gibunalan sa mga kawatan og kahoy ang nawong sa biktima una kini gaposa ug gikuha ang P15,000 nga kwarta ni Lero lakip na ang tulo ka mga cellphones nga nagkantidad tanan og P8,000.

Giingong usa ka silingan sa biktima ang nakakitang dunay mga lalaking misaka sa koral sa apartment apan wala lang niya kini panumbalinga tungod kay wala siya magdahom nga kawatan ba diay ang maong mga lalaki.

Ang kapolisan nagpahigayon og follow-up nga imbestigasyon sa maong hitabo. (BANAT NEWS)