Botika nga way pharmacist gidili

CEBU, Philippines - Ang Philippine Pharmacists Association (PPHA), Inc. mipasidaan sa publiko nga  magbantay  sa mga botikang walay pharmacist kay  gidili kini  sa balaod.

Matud pa ni PPHA Executive Director Yolanda Robles, kinahanglang may pharmacist ang matag botika, gamay o daku man  aron  may  mogiya  sa mga  mopalit og  tambal sa hustong matang sa  tambal nga  ilang  paliton.

Matud  pa  ni  Robles  nga nakalapas sa balaod ang mga botikang walay pharmacist tungod kay requirement man sa Food and Drug Administration (FDA) ang pagbaton og pharmacist sa mga botika.

Giingong kadaghanan sa mga botika karon adunay sertipikasyon sa usa ka pharmacist apan kasagaran wala man kini sa botika aron motambag sa mga mopalit ug sa  mga masakiton  nga mopalit og tambal.

Gawas niini, miingon usab si Robles nga delikado usab ang botikang walay pharmacist tungod kay ang  pagbaligya  og  medisina  niini  susama  na lang  sa candy.  Gitin-aw usab ni Robles nga ang  gikataho  nga  70% sa mga botika nga walay pharmacist gibase lamang sa usa ka lugar.

Mao nga may proyekto karon ang PPHA nga  susihon ang mga botika sa tibuok nasud kun may pharmacist ba kini hinungdan  nga  giawhag  niini  ang FDA  sa higpit nga pag-monitor sa mga botika.( /WC)   (BANAT NEWS)