Gilapsan sa 2 ka bala patay

CEBU, Philippines - Namatay  diha-diha  ang  usa ka lalaki  human  lapsi  sa duha  ka  bala  ang  lawas  niini  gikan  sa wala hiilhing  kriminal  nga mipusil kaniya  didto  sa barangay Bankal, dakbayan sa Lapulapu  sa miaging gabii.          Ang biktima mao si Ronilo Calapis Malingin, hingkod, ulitawo nga nagpuyo sa maong dapit .

Si PO1 Jomar Tolentino sa homicide section sa kapolisan sa maong dakbayan nga nahinabi sa Banat News miingon nga nagpahayahay  sa gawas sa ilang  balay ang biktima   dihang  may motorsiklong  kalit  nga mihunong  sa iyang  atubangan ug  gipusil  dayon  siya  sa nagsakay  niini unom ka higayon.

Matud pa ni P01 Tolentino nga samdan  sa duha  ka  bala ang bukobuko sa biktima  kansang  mga  bala pulos  milapos  sa iyang dughan, may samad  usab  sa liog  ug  uban  pang  bahin  sa lawas  nga  maoy  hinungdan  sa  hinanali niining kamatayon.

Human  mahagba  sa  yuta  gibiyaan  kini  sa kriminal  kinsa  dali kaayong  nakapahilayo  gikan  sa maong  lugar.          Nasayran ni PO1 Tolentino  nga nawala  sa ilang dapit ang biktima sulod sa pipila ka buwan ug  tulo pa lang  kini  ka adlaw  human  mauli  ug  dayon  gipatay.          Dugang pa ni PO1 Tolentino nga wala usab masayod ang mga kabanay sa biktima kun may gikaaway   ba  kini sa ilang dapit o nalambigit ba kini og illegal nga kalihokan nga posible nga maoy  hinungdan  nga siya  gipatay. (Romeo  T.  Limpangog/WC) (BANAT BALITA)