7-anyos gilugos sa tawong gipabantay kaniya

CEBU, Philippines - Arestado ang usa ka 33-anyos nga lalaki human kini gitumbok sa 7-anyos nga bata sa barangay Tejero sa siyudad sa Sugbu nga maoy milugos kaniya sud sa balay sa suspek niadtong Huwebes sa buntag.

Ang suspek giilang si Melchor Rosales, 33, molupyo sa maong dapit nga kasamtangan karong gitanggong sa Waterfront Police Station.

Matud pa ni PO3 Mary Grace Salise, Women’s Desk investigator  sa Police Station 3 , gisalig sa inahan ang biktima diha sa banay’ng Rosales nga ilang silingan tungod kay mi-duty kini.

Matud pa nga dako kaayo ang pagsalig sa inahan sa bata ngadto sa pamilyang Rosales tungod kay suod silang maghigala sa suspek.

Nianang pagkabuntag tungod kay gikatahong milakaw na ang asawa sa suspetsado ingon man ang mga anak niini nakakita og higayon ang suspetsado nga pahimuslan ang bata.

Matud pa ni Salise human sa paglugos gipapauli sa suspek ang bata sa ilaha apan didto misumbong ang bata sa inahan kinsa daling midangop sa barangay hall ug gidala ang bata sa Vicente Sotto Memorial Medical Center.

Sumala pa ni Salise didto nahibaw-an nga nalugos gyud ang biktima, ang bata giingong na-trauma sa nahitabo kaniya ug gikinahanglang matabangan sa mga social welfare.

Apan ang suspetsado hugtanon nga mihimakak sa pasangil kay matud niya dili niya kini mahimong buhaton tungod kay nasuod kaniya ang bata ug duna usab siyay mga anak nga babaye.

Nagduda hinuon si Rosales nga adunay kalagot ang inahan sa biktima ngadto kaniya hinungdan nga gipadakop siya niini ug gihimo-himoan og estorya. Kasong rape ug child abuse ang ipasaka batok sa suspetsado. (Lesley Caminade-Vestil/EIM) (BANAT BALITA)