65mil mitambong sa Team P.Noy ug BOPK rally
CEBU, Philippines - Mokabat sa kapin 65 mil ang mga tawong mitambong sa proclamation rally sa Bando Osmeña Pundok Kauswagan kagahapon nga gihimo diha sa Capitol Grounds nga gitambongan ni Presidente Benigno Aquino.
Nagsugod ang kalihukan eksaktong alas 4:30 sa hapon nga gipangulohan ni Kongresista Tomas Osmeña, Joy Young, gubernatorial candidate Hilario "Junjun" Davide ug acting governor Agnes Magpale.
Diha usab sa maong kalihukan ang mga senatorial candidate nga sila si Jamby Madrigal; Loren Legarda; Chiz Escudero, Sonny Angara; Grace Poe, Riza Hontiveros; Koko Pimentel ug ang batan-ong ig-agaw sa pangulo nga si Bam Aquino.
Gipresentar usab ni Magpale ang mga kandidato ug mihatag og gamay nga background kabahin sa history sa Capitol.
Diha sa maong kalihukan si Department of Interior and Local Government Secretary Mar Roxas.
Sa pamahayag ni Aquino, kini miingon nga siguruhon nila nga mas modaghan pa ang oportonidad sa Sugbu kung pulos makadaog sila si Osmeña, Davide ug Magpale sa tagsa-tagsa nila ka posisyon nga gidaganan.
Gipahibalo usab ni Aquino nga karong tuig 2013, makompleto na ang mga classrooms sa tibuok nasud ingon man ang mga libro ug mga lingkuranan nga gipang apud-apod sa mga eskuylahan.
Ang gidaghanon sa mga tawong nanambong nga kompleto pa og mga unipormeng “Type O†ug nagkalainlain ang kolor mas daghan kun itandi sa mitambong nga 30 mil ka tawo sa Plaza Independencia sa proklamasyon sa mga kandidato sa Team Rama.
Ang Police Regional Office director Chief Supt. Marcelo Garbo Jr. ug Cebu City Police Office director Sr. Supt. Mariano Natuel Jr. mibana-bana sa mga tawo nga mokabat sa 65 mil.
Si Osmeña tataw nga nalipay niini ug mipalabtik pa sa iyang kaatbang sa pag-ingon nga: "Mike (Rama) is still counting, and still counting."
Apan nasayran nga ang mga misalmot sa maong kalihukan gihatod sa mga nagkadaiyang sakyanan nga ang uban gidekorasyonan pa nga susama og floats gikan sa nagkalain-laing barangay. (Fiona Jane Bacuado /EIM) (BANAT BALITA)
- Latest
