Mason giluba patay sa kontra

CEBU, Philippines - Gidunggab patay  sa gituohang  kontra  ang usa ka mason samtang kini   diha sa akto  nga nagsemento  sa   balay  nga  iyang  gitrabahoan  didto sa barangay Mantalongon sa lungsod sa Dalaguete niadtong Huwebes sa ala 1:00 sa hapon.

Ang biktima mao si Jomar Jimenez, 30, ulitawo,  usa ka    mason,  nga  taga Sitio Grandchina barangay Mantalongon, Dalaguete.

Samtang ang suspek mao si Crispin Pialan, 32 , minyo, nagpuyo sa Sitio Katambisan, barangay Mantalongon ug usa ka mag-uuma. Si SPO1 Veronico Centino sa Dalaguete Police  Station mibutyag  sa  Banat News   nga  samtang  nagsemento   sa  pinuy-anan ni Antonia Alonzo, ang  biktima,  kalit lang miabot ang suspek .

Wala  makabantay  ang  biktima  nga  siya’y  tuyo  niini  busa  wa  siya  kalikay  dihang  gihansakan  sa kutsilyo  ang  iyang  bukobuko ug  gibiyaan  niining  nagtaop  ang  kutsilyo  sa likod  sa biktima.

Ang biktima patay nang naabtan sa mga polis nga mirespondi samtang ang suspek nadakpan  usab  dayon    sa kapolisan  ug  karon  nagtingkagol  na sa prisohan  human  ikapasaka  ang  tukmang  kiha  batok  kaniya. (/WC) (BANAT BALITA)