5 dept. heads sa CH di ipiton
CEBU, Philippines - Walay himuon si Mayor Michael Rama ngadto sa lima ka department heads sa City Hall nga iyang nahibaw-ang dili hingpit nga mosuporta sa iyang administrasyon.
Matud ni Rama nga ang lima ka department head sa City Hall “nadala sa hata†dihang gusto niya nga sutaon kun kinsa sa mga department heads nga lunod patay nga mosuporta kaniya.
Dihang gipatawag ni Rama ang tanang department heads kaniadtong Martes sa hapon didto sa iyang opisina, matud ni Rama gituyo niya ang pagkwestyon kun kinsa kanila ang andam moserbisyo para kaniya.
Si City Veterinarian Alice Utlang mitug-an sa mga reporters nga wala sila makauyon dihang giingnan ni Rama nga ang serbisyo nga iyang gipasabot maglakip sa suporta kabahin sa politika.
Si Rama mibiya dihang mibiya ang lima ka department heads nga sila si City Treasurer Emma Villarete, Internal Control Office (ICO) head Arlene Rentuza; Personnel Head Evangeline Abatayo, Department of Manpower Development and Placement (DMDP) head Fidel Magno, City Legal Officer Joseph Bernaldez ug si Utlang.
Matud ni Rama nga nalipay siya nga nasayud kun kinsa sa mga department head nga iyang malauman nga motrabaho gyud ug mahimong matawag bisan lapas na sa ilang oras sa opisina.
Pagkakaron gidili ubos sa balaud nga ang usa ka opisyal sa kagamhanan makahimo og lakang sama sa pagtaktak, pagsuspenso og ubang matang sa pagdisiplina sa mga kawani. (Rene U. Borromeo ug Fiona Jane Bacuado,CNU Intern/EIM)
- Latest
