Bella Ruby magpasakop sa religious group

CEBU, Philippines - Dako ang kalipay sa kampo ni Bella Ruby Santos human kini makauli sa ilang balay kagahapon tungod sa pagtugot sa korte nga makapiyansa kini sa kasong kidnapping ug murder sa 6-anyos nga si Ellah Joy Pique.

Si Santos nakabutang og P500 mil nga piyansa niadtong Lunes ug kagahapon sa alas 9:30 sa buntag gipagawas kini gikan sa Naga City Jail.

Ang maguwang ni Santos nga si Anna Marion Lalican ug iyaan niining si Carmen Paulo, 58, naghilak nga mipadayag sa ilang tumang kalipay sa paggawas ni Santos gikan sa bilanggoan.

Gikan sa prisohan sakay sa usa ka sports utility vehicle si Santos ug ang iyang pamilya dayon milahos sa Our Lady of Rosary Parish sa barangay  Inayagan, dakbayan sa Naga.

Si Santos, 37-anyos, nagluhod nga naghilak diha ubos sa imahen sa Mahal nga Birhen sa Rosario. Gikan sa simbahan milahos na sila ngadto sa ilang balay diin dunay gipahigayong gamay’ng salo-salo.

Matud pa ni Santos didto siya makaamgo sa prisohan sa mga sayop niyang nahimo sa kinabuhi sama sa pagkausab sa iyang kinaiya dihang nakaangkon na siya og mga grasya ug wala gani siya makapasalamat sa Kahitas-an.

Dugang pa niya, magpasakop na siya og usa ka relihiyosong pundok alang sa iyang espirituhanong panginahanglan.

Sa laing bahin, si Renante Pique amahan ni Ellah Joy nakahilak  sa ilang kaguol ug kasagmuyo nga nakagawas si Santos sa prisohan tungod sa kabalakang moikyas kini.

Si Renante kombinsido nga si Santos gyud ug ang uyab niining si Ian Charles Griffiths ang midagit ug mipatay sa iyang anak niadtong Pebrero 8, 2011. (BANAT NEWS)