Ambush sa Pier 3 Personal nga bangi, bug-at nga motibo

CEBU, Philippines - Nila ni Lesley Caminade-Vestil ug report nila ni Fiona Jane Bacuado ug Gereth Tancawan

Gawas sa anggulo sa politika, personal nga panagbangi ang laing gisusi karun sa kapolisan sa nahitabong pag-ambush sa duha ka mga babaye diha sa dalan V. Sotto corner Osmeña Blvd. barangay Tinago ning dakbayan sa Sugbu.

Ang namatay nga mabdos nga si Crisanta Lauro, 39, giingong kapuyo karon sa kasamtangang mayor sa Pio V. Corpuz nga si Herminigildo Betonio III, samtang igsuon sa mayor ang naangol nga si Konsehal Lenny Betonio Eser.

Ang hepe sa kapolisan sa dakbayan sa Sugbo, Sr. Supt. Mariano Natuel Jr. miingon nga mas dako ang ilang pagdudang dili politika ug personal ang motibo sa maong krimen.

Hitting two birds in one stone. Duna tay info nga we can’t divulge kay personal kaayo,” matud pa ni Natuel.

Dugang pa ni Natuel nga aduna na silay mga gisundan nga mga posibleng responsable sa pagpangbanhig.

Matud ni Natuel nga posibleng adunay impormante ang mga gunmen nga sakay usab sa barkong gisakyan sa mga biktima.

Imbitaron sa kapolisan ang kanhi bana sa namatay’ng si Lauro nga si Placer Surigao del Norte former mayor Charry Mangakop aron paghatag og katin-awan sa maong hitabo.Gidala na ni Betonio ang patay’ng lawas ni Lauro balik sa Masbate.

Sa  report sa TV Patrol Central Visayas kagahapon, si Betonio namahayag nga walay kontra si Crisanta ug giangkon niyang wala sila makasal sa naulahi tungod kay wala ma-annul ang kasal niya sa asawa nga milarga na sa ubang nasud.

Andam hinuon ihatag ni Betonio ang mga anak ni Crisanta ngadto ni Mangakop.

Samtang sa laing interbyu sa Balitang Bisdak sa bana ni Lauro, kini mikwestyon nganong gidala ni Betonio ang patay’ng lawas sa iyang asawa. (BANAT NEWS)