Koreyanong miinom og hilo uban sa patay nga babaye namatay na

CEBU, Philippines - Koreyanong miinom og hilo human niya giingong gipatay ang iyang higalang babaye sud sa usa ka hotel sa barangay Basak sa dakbayan sa Lapulapu namatay sa tambalanan sa dakbayan sa Sugbu. Si Hyun Chul Whang, 29, sud sa duha ka bulan nga pag-antos sa tambalanan nakabsan gyud kini sa iyang kinabuhi sa milabay’ng Sabado.

Matud pa ni Lapulapu City Police Office Director Sr. Supt. Rey Lyndon Lawas “case closed" na ang kaso ni Whang kay namatay na man kini.

Si Whang suspek sa kamatayon sa higala ug gikauban niini sa negosyo nga si Whenvy Jean dela Cruz Noel, 21, ug residente sa Brgy. Kalawisan sa dakbayan sa Lapulapu sa milabay’ng bulan sa Pebrero ning tuiga.

Andam na unta ang kasong murder nga ipasaka sa kapolisan batok ni Whang apan ila pang gihulat nga makahatag usab sa iyang habig ang Koreyano sa dili pa nila kini ipasaka sa korte.

Sa milabay’ng adlaw gikuha na sa mga ginikanan ug kabanay sa Koreyano ang abo niini human nga gi-cremate ang patay’ng lawas ni Whang.

Kahinumduman nga si Noel napalgang patay nga hubo ang lawas ibabaw sa kama nga nagkadugo sulod sa usa ka hotel sa Basak- Ibabao sa dakbayan sa Lapulapu, samtang si Whang nagbula ang baba ug gituohang miinom og hilo. Matud pa ni Lawas hangtod karon wala pa masayri kung unsa nga matang sa hilo o kemikal ang giinom sa Koreyano nga nakapa-comatose kaniya sud sa duha ka bulan. (BANAT NEWS)